Angliya terma jamoasining sobiq himoyachisi Kayl Uoker bosh murabbiy Thomas Tuchel tomonidan Fil Foden, Harry Maguire va Trent Alexander-Arnoldning Jahon chempionati qaydnomasidan chetlashtirilganiga oʻz munosabatini bildirdi. Shimoliy Amerikada boʻlib oʻtadigan turnir uchun eʼlon qilingan 26 kishilik tarkibda ushbu yulduzlarning yoʻqligi futbol jamoatchiligida katta muhokamalarga sabab boʻldi. Bu haqda Goal.com xabar beradi.
Uoker talkSPORT nashriga bergan intervyusida Fil Fodenning holatiga alohida toʻxtalib oʻtdi. Uning soʻzlariga koʻra, Fodenning Manchester Siti safida Pep Guardiola qoʻl ostida yetarli oʻyin amaliyotiga ega boʻlmagani Tuchelning qaroriga taʼsir qilgan boʻlishi mumkin. Kayl Uoker Fil Fodenning maydondagi istalgan vaziyatda oʻyin taqdirini hal qila olishini taʼkidlab, uning eng yaxshi pozitsiyasi "oʻninchi raqam" ekanligini qoʻshimcha qildi.
Shuningdek, sobiq himoyachi Manchester Yunayted sardori Harry Maguire borasida ham oʻz fikrlarini bildirdi. Uoker Maguierening tajribasi va yirik turnirlardagi ishonchli oʻyini, hatto penaltilar seriyasidagi masʼuliyatni oʻz boʻyniga olishi jamoa uchun muhim ekanligini aytdi. Uning fikricha, himoyachi bu mavsumdagi harakatlari bilan tarkibga loyiq edi va bu qaror futbolchi uchun ogʻir zarba boʻlgan.
Trent Alexander-Arnoldning Real Madrid klubiga oʻtganiga qaramay tarkibdan chetda qolishi ham Uokerni hayron qoldirdi. U Real Madrid kabi grand jamoada toʻp suradigan futbolchining terma jamoaga chaqirilmasligi kamdan-kam uchraydigan holat ekanligini aytdi. Shunga qaramay, Kayl Uoker muxlislarni Thomas Tuchel qarorlarini qoʻllab-quvvatlashga va Jahon chempionati oldidan jamoa atrofida birlashishga chaqirdi.
“Zamin”ni Telegramʻda oʻqing!
