Braziliyalik darvozabon Alisson kelasi mavsumda ham Liverpul tarkibida qolishi kutilmoqda. Italiyaning Yuventus klubi tomonidan bildirilayotgan jiddiy qiziqishlarga qaramay, Mersisayd klubi oʻz posbonini Enfildda olib qolish niyatida qatʼiy turibdi. Bu haqda Goal.com xabar beradi.
Angliya Premer-ligasi yakunlanganidan soʻng, Alissonning kelajagi borasidagi turli mish-mishlar avj olgan edi. Ayniqsa, jarohatidan soʻng Brentfordga qarshi oʻyinda maydonga tushishi koʻpchilik muxlislarda bu uning jamoadagi soʻnggi uchrashuvi boʻlishi mumkinligi haqida xavotir uygʻotdi. Biroq, klub rahbariyati 33 yoshli darvozabon bilan amaldagi shartnomani uzaytirish bandini faollashtirib, uning jamoa rejalaridagi oʻrni muhimligini koʻrsatib qoʻydi.
Italiya matbuoti, xususan, La Gazzetta dello Sport nashri Yuventus may oyida futbolchi bilan shaxsiy shartnoma shartlarini muhokama qilgani haqida xabar tarqatgan edi. Turinliklar yangi asosiy darvozabon qidirayotgan boʻlsa-da, klublar oʻrtasida hali hech qanday rasmiy kelishuvga erishilmagan.
Taniqli insayder Fabrizio Romano oʻzining X sahifasida Liverpul rahbariyati Alisson bilan bogʻlanib, uni yana bir yil jamoada olib qolish niyatida ekanligini maʼlum qilganini yozdi. Romanoning soʻzlariga koʻra, Yuventus uzoq muddatli shartnoma taklif qilgan boʻlsa-da, Liverpul sotuvga rozilik bermayapti.
Hozircha barchasi futbolchining oʻz pozitsiyasiga bogʻliq boʻlib turibdi. Agar Alissonning oʻzi ketishni talab qilmasa, Liverpul uni transferga qoʻymaydi. Mavsum yakunida jarohatdan muvaffaqiyatli qaytishi uning jamoa uchun naqadar qadrli ekanligini yana bir bor isbotladi.
“Zamin”ni Telegramʻda oʻqing!
