Liverpul jamoasining asosiy darvozaboni Alisson atrofida kutilmagan transfer mish-mishlari urchimoqda. Sobiq darvozabon Bred Fridel GOAL nashriga bergan intervyusida braziliyalik posbonning ketishi Muhammad Salahning ketishidan koʻra ogʻirroq zarba boʻlishi mumkinligini taʼkidladi. Agar Alisson jamoani tark etsa, uning oʻrniga munosib nomzod sifatida Jahon chempioni Emi Martinez koʻrilmoqda. Bu haqda Goal.com xabar beradi.
Alisson 2018-yilda Roma safidan kelib qoʻshilganidan beri Liverpul himoyasining eng ishonchli vakili boʻlib kelmoqda. U Mersisayd klubi safida 333 ta oʻyinda maydonga tushib, Angliya Premer-ligasi, Chempionlar ligasi, Angliya kubogi va Liga kubogi kabi nufuzli sovrinlarni qoʻlga kiritdi. Hozirda 33 yoshda boʻlgan darvozabonning shartnomasi yakunlanishiga 12 oy qolgan, bu esa uning Italiya klublariga sotilishi haqidagi gap-soʻzlarga sabab boʻlmoqda.
Fridelning fikricha, Arne Slot uchun Alissonni almashtirish dunyo futbolidagi eng qiyin vazifalardan biri boʻladi. "Alisson yakkama-yakka vaziyatlarda oʻyin tarixidagi eng yaxshi darvozabonlardan biri. Uning tajribasi va mahorati hatto yoshi oʻtganida ham koʻplab yosh posbonlardan ustun turadi. Uning ketishi Liverpul uchun katta yoʻqotish boʻladi", — deydi sobiq posbon.
Agar Alisson jamoani tark etadigan boʻlsa, Arne Slot uchun Emi Martinez kabi xarakterga ega darvozabon kerak boʻladi. Martinez oʻzining yetakchilik qobiliyati va muhim oʻyinlardagi sovuqqonligi bilan Liverpulning yangi birinchi raqamli posboniga aylanishi mumkin. Hozircha klub rahbariyati bu borada yakuniy qarorga kelmagan, biroq transfer oynasi qizgʻin pallaga kirmoqda.
“Zamin”ni Telegramʻda oʻqing!
