Yevropa chempioni Barselona oʻzining himoya qoʻrgʻonlari Mapi Leon va Ona Batlle kelasi oy oxirida shartnomalari yakunlangach, klubni tark etishini rasman tasdiqladi. Bu yangilik klub afsonasi Alexia Putellas Kataloniyadan ketishini eʻlon qilganidan bir necha kun oʻtib sodir boʻldi. Ushbu ketishlar soʻnggi yillarda ham ichki, ham Yevropa maydonlarida gegemonlik qilgan jamoa uchun jiddiy oʻzgarishlar davri boshlanganidan dalolat beradi. Bu haqda Goal.com xabar beradi.
Leon va Batlle joriy mavsumda Barselona bilan tarixiy kvadrupl (toʻrtta sovrin) qayd etishda muhim rol oʻynashdi. Jamoaning muvaffaqiyatli yurishi Osloda oʻtgan Chempionlar ligasi finalida Lion ustidan qozonilgan 4:0 hisobidagi gʻalaba bilan yakunlangan edi. Endilikda har ikki himoyachi Ispaniya chempionatini tark etib, faoliyatini Angliya ayollar superligasida (WSL) davom ettirishga yaqin turibdi.
ESPN nashrining xabar berishicha, 30 yoshli Mapi Leon London Siti Layonesses klubi bilan muzokaralarning yakuniy bosqichida turibdi. 2017-yilda Atletiko Madrid jamoasidan kelib qoʻshilgan Leon Barselona safida 300 dan ortiq oʻyin oʻtkazib, 27 ta sovrin, jumladan, 4 ta Chempionlar ligasi kubogini qoʻlga kiritgan haqiqiy afsonaga aylandi.
Ona Batlle esa katta ehtimol bilan Arsenal safiga borib qoʻshiladi. Avvalroq Manchester Yunayted safida oʻzini koʻrsatgan qanot himoyachisi 2023-yilda oʻzining qadrdon klubiga qaytgan edi. Uning universal mahorati Barselona uchun soʻnggi muvaffaqiyatli mavsumlarda kalit vazifasini oʻtadi. Endilikda u Renee Slegers qoʻl ostidagi Arsenal jamoasiga Chelsi va Manchester Siti bilan raqobatda yordam berishi kutilmoqda.
“Zamin”ni Telegramʻda oʻqing!
