Barselona transfer bozoridagi faolligini davom ettirmoqda. Ispaniya klubi rahbariyati himoya chizigʻini kuchaytirish maqsadida ayni damda Arsenal safida toʻp surayotgan Piero Hincapie nomzodini koʻrib chiqmoqda. Daily Mail nashrining xabar berishicha, kataloniyaliklar 24 yoshli himoyachini Londondan olib ketish qiyin boʻlishini bilsalar-da, transfer borasida soʻrov yuborishni rejalashtirishgan. Bu haqda Goal.com xabar beradi.
Hincapie hozirda Bayer Leverkusen klubidan Arsenal safiga ijaraga berilgan. Biroq shartnomada maʻlum shartlar bajarilganda kuchga kiradigan majburiy sotib olish bandi mavjud. Kutilishicha, Arsenal tez orada 52 million yevro toʻlab, ekvadorlik futbolchi bilan besh yillik shartnoma imzolaydi. Hincapie Mikel Arteta jamoasining muhim boʻlagiga aylangan va hatto Budapeshtda PSJga qarshi oʻtadigan Chempionlar ligasi finali uchun asosiy tarkibdan joy olgan.
Barselona allaqachon yozgi transfer kampaniyasini boshlab yuborgan. Jamoa Nyukasl United hujumchisi Anthony Gordon transferini hal qildi, shuningdek, Julian Alvarez va Bernardo Silva kabi yulduzlar ham tarkibga qoʻshilishi kutilmoqda. Sport direktori Deco klubning moliyaviy qiyinchiliklariga qaramay, kamida bitta markaziy himoyachi sotib olishni maqsad qilgan.
Inter himoyachisi Alessandro Bastoni bilan bogʻliq muzokaralar toʻxtab qolganidan soʻng, Hincapie asosiy nishonga aylandi. Chap oyoqda yaxshi oʻynaydigan va qanotda ham harakat qila oladigan himoyachi Barselona talablariga toʻliq javob beradi. U oʻtgan mavsumda Xabi Alonso qoʻl ostida Bayer Leverkusen bilan Bundesliga va Germaniya kubogida gʻolib chiqib, oʻz mahoratini yuqori darajada namoyish etgan edi.
“Zamin”ni Telegramʻda oʻqing!
