Toshkentda o‘tkazilayotgan professional boks oqshomida o‘zbekistonlik Olimpiada chempioni Abdumalik Xalokov navbatdagi jangida ringga ko‘tarildi. Hamyurtimiz hindistonlik Vishal Kumarga qarshi bahs olib bordi.
6 raundga mo‘ljallangan jang uzoq davom etmadi. Xalokov ilk daqiqalardanoq tashabbusni o‘z qo‘liga oldi va raqibiga bosim o‘tkaza boshladi. Ikkinchi raundda esa Abdumalik aniq va kuchli zarbalari orqali Vishal Kumarni texnik nokaut bilan mag‘lubiyatga uchratdi.
Bu g‘alaba Xalokovning professional ringdagi uchinchi jangidagi uchinchi muvaffaqiyati bo‘ldi. Olimpiada chempioni havaskor boksdagi yuqori darajasini prof ringda ham namoyish etishda davom etmoqda.
Abdumalikning ishonchli g‘alabasi muxlislar uchun yana bir quvonchli xabar bo‘ldi. U qisqa vaqt ichida raqibini yengib, professional boksda ham katta maqsadlar sari jiddiy qadam tashlayotganini ko‘rsatdi.
Qisqasi, Abdumalik Xalokov Toshkentdagi prof boks oqshomida Vishal Kumarni ikkinchi raundda texnik nokaut bilan mag‘lub etdi. 3 ta jang, 3 ta g‘alaba — start zo‘r, temp esa chempionlarcha.
“Zamin”ni Telegramʻda oʻqing!
