Myunxenning Bavariya klubi yozgi transfer oynasi uchun rejalarini qayta koʻrib chiqishga majbur boʻlmoqda. Dastlab klub chap qanot va markazda oʻynay oladigan hujumchi hamda qanot himoyachisini sotib olishni rejalashtirgan edi. Biroq, asosiy maqsad boʻlgan Anthony Gordon 80 million yevro evaziga Barselona safiga oʻtib ketishi nemis klubining rejalarini oʻzgartirib yubordi. Bu haqda Goal.com xabar beradi.
Hozirda klub eʼtiborini markaziy himoya chizigʻini mustahkamlashga qaratgan. Soʻnggi haftalarda Manchester Siti vakillari John Stones va Josko Gvardiol nomlari Myunxen klubi bilan bogʻlanayotgan edi. Ammo sport direktori Max Eberl John Stonesga boʻlgan qiziqishni rad etdi. Buning oʻrniga klub rahbariyati boshqa jiddiy nomzodlarni oʻrganishni boshlagan.
Fransiyalik himoyachi Ibrahima Konate joriy yozda Liverpulni erkin agent sifatida tark etishi kutilmoqda. L'Equipe nashrining xabar berishicha, Bavariya ushbu futbolchi uchun kurashda Chelsi va Real Madrid klublariga raqobatchilik qiladi. Konate avvalroq RB Leipzig va Fransiya terma jamoasida Dayot Upamecano bilan mustahkam tandem hosil qilgan edi.
Hozirda Bavariya tarkibida Dayot Upamecano va Jonathan Tah asosiy himoyachilar hisoblansa-da, klub rahbariyati tarkibni yanada kengaytirishni istamoqda. Min-Jae Kim va Hiroki Ito munosib taklif tushsa, jamoani tark etishi mumkin. Zaxirada esa faqat Josip Stanisic qolayotgani sababli, yangi himoyachilar transferi klub uchun ustuvor vazifaga aylangan.
“Zamin”ni Telegramʻda oʻqing!
