Fransiya terma jamoasi himoyachisi Ibrahima Konate Liverpul klubini tark etishi rasman tasdiqlandi. Mersisaydliklar sobiq Bundesliga oʻyinchisining ketishini eʻlon qilganidan soʻng, futbolchi ijtimoiy tarmoqlarda muxlislarga hissiyotlarga boy murojaat yoʻlladi. "Oxirgi oʻyinda barchangiz bilan xayrlashish imkoniyati boʻlmaganidan juda xafaman. Oʻshanda bu libosni sizlarning qarshingizda oxirgi marta kiyayotganimni bilmagandim", — deb yozdi 27 yoshli himoyachi Instagram sahifasida. Bu haqda Goal.com xabar beradi.
Konatening soʻzlaridan anglashiladiki, u Liverpul rahbariyati bilan shartnomani uzaytirish boʻyicha muzokaralar muvaffaqiyatsiz yakunlanganidan hayratda qolgan. Bir necha oy davom etgan muzokaralar aprel oyida ijobiy yakunlanadigandek koʻringan edi. Aprel oʻrtalarida Liverpulning Everton ustidan qozonilgan gʻalabasidan soʻng, futbolchi kelishuvga yaqin ekanini aytgan, biroq yakunda tomonlar bir qarorga kela olishmadi.
Klub yakshanba kuni rasmiy bayonot berib, Ibrahima Konate shartnomasi yakunlangani sababli jamoani tark etishini tasdiqladi. Liverpul rahbariyati unga Anfielddagi faoliyati va qoʻshgan hissasi uchun minnatdorchilik bildirdi. Konate 2021-yilda RB Leipzig klubidan 40 million yevro evaziga transfer qilingan edi. U jamoa bilan 2025-yilda Angliya Premer-ligasi chempionligini va boshqa bir qator sovrinlarni qoʻlga kiritdi.
"Men bu yerga katta orzular bilan yosh futbolchi boʻlib kelgan edim, bugun esa bir umr esda qoladigan xotiralar bilan ketyapman. Liverpulda oʻynash men uchun sharaf edi", — deya qoʻshimcha qildi himoyachi. U endi yangi chaqiriqlar va yangi sahifa vaqti kelganini taʻkidladi.
Hozirda Konatega bir qator grand klublar qiziqish bildirmoqda. L'Equipe nashrining xabariga koʻra, Chelsi, PSJ va Bavariya uning transferi ustida ishlamoqda. Shuningdek, Saudiya Arabistoni chempioni Al-Ittihad ham markaziy himoyachini oʻz safiga qoʻshib olishga tayyor turibdi.
“Zamin”ni Telegramʻda oʻqing!
