Braziliya terma jamoasi bosh murabbiyi Karlo Anchelotti jamoaning hozirgi holati haqida ochiqchasiga gapirib, "Selesao" tarkibida avvalgi yillardagi kabi yirik ikonalar qolmaganini taʼkidladi. Italiyalik mutaxassisning fikricha, besh karra jahon chempionlari endi yagona superyulduzga tayanish oʻrniga, jamoaviy oʻyinga koʻproq eʼtibor qaratishlari lozim. Bu haqda Goal.com xabar beradi.
Marakana stadionida Panamaga qarshi oʻtkaziladigan oʻrtoqlik uchrashuvi oldidan Real Madrid sobiq ustozi muvaffaqiyatga erishish uchun masʼuliyatni taqsimlash kerakligini aytdi. "Baʼzan Braziliyada yulduz yoʻqligi haqida koʻp gapiramiz. Bu haqiqat boʻlishi mumkin, bizda Pele, Romario yoki Ronaldo yoʻq, lekin bizda umumiy masʼuliyat bor. Tajribali futbolchilar koʻproq javobgarlikni boʻyniga olishi, yoshlar esa kamroq bosim ostida oʻynashi kerak", — dedi Anchelotti.
Murabbiy, shuningdek, himoya chizigʻini mustahkamlash ustida koʻp ishlayotganini, biroq hujumchilarning kreativligini cheklamoqchi emasligini bildirdi. Uning soʻzlariga koʻra, himoyachilar, qanot vakillari va yarim himoyachilarning roli Jahon chempionatida hal qiluvchi ahamiyatga ega boʻladi. Braziliya 2002-yildan buyon ilk bor jahon tojini qaytarib olishni maqsad qilgan.
Jamoaning asosiy yulduzi Neymar jarohati tufayli mashgʻulotlarni toʻliq oʻtkaza olmayotgan boʻlsa-da, Anchelotti uni tarkibga kiritishga qaror qildi. Murabbiy avvalroq faqat 100 foiz tayyor futbolchilarni jalb qilishini aytgan edi, biroq 128 ta oʻyinda 79 ta gol urgan tajribali hujumchi uchun istisno qildi.
Anchelotti Neymar turnirning hal qiluvchi pallalariga qadar oʻz sport formasini tiklab olishiga ishonch bildirmoqda. "Biz Militao, Rodrygo va Estevaoni yoʻqotdik, ammo Neymar Jahon chempionatiga qadar 100 foiz tayyor boʻladi", — deya qoʻshimcha qildi murabbiy matbuot anjumani davomida.
“Zamin”ni Telegramʻda oʻqing!
