Amaldagi jahon chempionlari oʻz unvonlarini himoya qilishga tayyorgarlik koʻrish uchun AQSHga yetib kelishdi. Lionel Messi yakshanba kuni Kansas City shahriga Albiceleste tarkibini boshlab keldi. Bu tashrif muxlislar oʻrtasida katta hayajon uygʻotish bilan birga, ushbu turnir afsonaviy futbolchining terma jamoadagi soʻnggi musobaqasi boʻladimi degan savollarni ham keltirib chiqardi. Bu haqda Goal.com xabar beradi.
Argentina terma jamoasi Missouri shtatiga Ezeiza xalqaro aeroportidan 11 soatlik parvozdan soʻng yetib keldi. Jamoa ramziy maʼnoga ega boʻlgan Aerolineas Argentinas aviakompaniyasining 1978-reysida uchib keldi — bu raqam jamoaning ilk bor jahon chempioni boʻlgan yiliga ishoradir. Airbus A330 samolyotining dum qismida Lionel Messi ramziy 10-raqami va uchta oltin yulduz tasvirlangan.
Lionel Scaloni boshchiligidagi 26 kishilik tarkibning asosiy qismi allaqachon Kansas City markazidagi Origin mehmonxonasiga joylashdi. Jamoa dushanba kuni Sporting Kansas City klubiga tegishli boʻlgan Compass Minerals milliy sport markazida ilk toʻliq mashgʻulotlarini oʻtkazishi rejalashtirilgan. Yevropada toʻp suradigan ayrim yulduzlar jamoaga biroz kechroq qoʻshilishi kutilmoqda.
Hozirda barchani jamoa sardorining jismoniy holati xavotirga solmoqda. Turnir davomida 39 yoshni qarshi oladigan Lionel Messi chap oyogʻidagi mushak zoʻriqishi bilan kurashmoqda. Terma jamoa tibbiy shtabi uning maydonga tushishi "klinik va funksional tiklanish jarayoniga" bogʻliqligini maʼlum qildi. Argentina oʻzining ilk uchrashuvini 16-iyun kuni Jazoirga qarshi oʻtkazadi.
Murabbiy Lionel Scaloni Lionel Messi faoliyatini yakunlashi haqidagi gap-soʻzlarga toʻxtalib, uni maydonda koʻrmaslik ogʻir boʻlishini taʼkidladi. "Uning oʻynashda davom etishini xohlayman, chunki Diego Maradona kabi afsonalarni maydonda koʻrmaslik odamni xafa qiladi. Ular futbol tarixini yaratgan oʻyinchilar. Uning ketishi haqida oʻylash tinchlik bermaydi, shuning uchun hozirgi vaqt bilan yashashni afzal koʻraman", — dedi murabbiy.
“Zamin”ni Telegramʻda oʻqing!
