Bugun futbol. “Nasaf” – “Al Faysaliy”

Bugun Qarshi shahridagi “Markaziy” stadionda katta futbol bayrami. “Nasaf” o‘z maydonida Iordaniyaning “Al Faysaliy” jamoasiga qarshi maydonga tushadi. Uchrashuvda “ajdarlar” OChL-2018 guruh bosqich yo‘llanmasini hal qilishadi.

OChL-2018. Pley-off uchrashuvi
“Nasaf” (Uzbekiston) – “Al Faysali” (Iordaniya)

30.01.2018. Qarshi sh., “Markaziy” stadion. 16:00da
Bosh hakam: Xiryuki Kimura (Yaponiya)

Qanot hakamlari: Ochi Shinji, Takagi Takumi (ikkalasi ham Yaponiyadan)
Zaxira hakami: Nasrullo Kabirov (Tojikiston)

Nazoratchi: Ali Hamad Badaviy (BAA)
Uchrashuv komissari: Dorji Mindu (Butan)

Umuman olganda “Al-Faysaliy” klubi “ajdarlar”ga notanish emas. Mazkur jamoalar bungacha OFK kubogining nimchorak finalida tuqnash kelishgan. 2011 yili 24 mayda, “Markaziy” stadionda bo‘lib o‘tgan o‘zaro uchrashuvda jamoamiz raqibini 2:1 hisobida mag‘lub etgan va chorak final yo‘llanmasini qo‘lga kiritgan.

Bugun bo‘ladigan uchrashuvda jamoalar oldida boshqacha vazifa turibdi. Bitta uchrashuvdan iborat pley-off bahsida g‘olib bo‘lgan jamoa, OChL-2018ning “S” guruhida yurishini davom ettiradi.

Bugun futbolchilarimiz OChL-2018ning to‘laqonli ishtirokchisi bo‘lishi uchun maydonda javlon urishadi. Ming-minglab jamoamiz ishqibozlari, tribunalarda turib ularga dalda bo‘lishadi.

Qashqadaryo vohasi oppoq qor bilan qoplangan bo‘lsada, ertalabdan musaffo osmonimizda quyosh charaqlamoqda. Futbol uchrashuvi haqiqiy bayram bo‘lishi uchun, stadionimiz xodimlari ham ertalabdan ishga kirishgan.

Shunday ekan, “Markaziy” stadionimizga marhamat qiling. Haqiqiy futboldan barhamand bo‘ling.

Manba: www.fcnasaf.uz “Zamin” yangiliklarini “Youtube”da kuzatib boring