«Liverpul» klubi mavsumdagi ilk mag‘lubiyatini tan oldi

Angliya chempionatining 21-turidan o‘rin olgan «Manchester Siti» – «Liverpul» uchrashuvi o‘z nihoyasiga yetdi. «Etixad Stedium»da bo‘lib o‘tgan bahsda mezbonlarning qo‘li baland keldi.

Uchrashuv teng kurashlar ostida boshlandi, to‘p nazorati kutilganidek maydon egalarida bo‘lgan bo‘lsa, mersisaydlar o‘zlarining xavfli yurishlari bilan ajralib turishdi.

Biroq hisob 40-daqiqaga kelibgina ochildi, chap qanotda faollik ko‘rsatgan Bernardu Silva to‘pni markazdagi Serxio Agueroga uzatdi, argentinalik futbolchi esa darvozaning yuqori burchagini aniq nishonga oldi.

Ikkinchi bo‘lim ham ikki tomon faolligida boshlandi. Mehmonlarning 64-daqiqadagi uzoq davom etgan hujumlarini Roberto Firmino gol bilan yakunladi.

Ammo oradan uzoq vaqt o‘tmay mezbonlar yana hisobda oldinga o‘tib olishdi. Darvozabon boshlab bergan qarshi hujumga Leroy Sane o‘zining aniq zarbasi bilan nuqta qo‘ydi. O‘yin yakuniga qadar ikki jamoada ham bir qator imkoniyatlar yuzaga keldi, biroq ularni golga aylantirish futbolchilarga nasib etmadi.

Shu tariqa, Yurgen Klopp shogirdlari ushbu mavsumdagi ilk mag‘lubiyatlarini tan olishdi. «Siti» esa ochkolarini 50taga yetkazib olgan holda ikkinchi o‘ringa qaytdi va «Liverpul» (54) bilan oradagi farqni to‘rt ochkogacha qisqartirdi.

APL, 21-tur
Manchester Siti – Liverpul 2:1 (1:0, 1:1)
Gollar: 1:0 – 40 Aguero, 1:1 – 64 Firmino, 2:1 – 72 Sane.

Manchester Siti – Ederson, Kompani (Otamendi, 88), Danilo, Stounz, Laport (Uoker, 86), Silva (Gyundogan, 65), Fernandino, Sterling, Bernardu Silva, Sane, Aguero.
Liverpul – Alisson, Lovren, Robertson, Aleksander-Arnold, van Deyk, Veynaldum (Starridj, 86), Xenderson, Milner (Fabino, 57), Mane (Shakiri, 77), Salax, Firmino.
Ogohlantirishlar: Lovren (20), Kompani (31), Veynaldum (38), Laport (45), Bernardu Silva (89), Ederson (90+5).

Manba: www.uff.uz “Zamin”ni Telegramʻda oʻqing!