Shohjahon Ergashev MMA bilan shug‘ullanmoqda

Professional boksda yengilmay kelayotgan Shohjahon Ergashev jismoniy holatini bir maromda ushlab turish, bo‘lajak janglarga tayyorgarlik ko‘rish uchun poytaxtimizda joylashgan "Legion fight club"ida mashg‘ulotlarini o‘tkazmoqda.

Bu yerda u MMA bo‘yicha Jasur Alijonov qo‘l ostida shug‘ullanmoqda. Kuniga ikki mahal davom etayotgan mashg‘ulotlarda Shohjahon boks bilan birgalikda MMA sport turi bo‘yicha ham tajribasini oshirmoqda. Yengilmas bokschimizga mashg‘ulotlar davomida umidli sportchimiz, MMA yo‘nalishida ikki marotaba jang o‘tkazgan Kamol Saburov ko‘maklashmoqda.

– Aralash jang san’ati sportning yakkakurash turlari orasida eng murakkabi. U bilan shug‘ullanish har bir sportchi uchun kerak. Bokschi bo‘lsam-da, bo‘lajak janglarimda muvaffaqiyatga erishish uchun MMA bilan shug‘ullanmoqdaman, – deydi Sh.Ergashev Sports.uz sayti muxbiriga.

Shohjahon Professional boksda bugunga qadar 18ta jangda ringga ko‘tarilgan bo‘lib, ularning 16 tasida raqiblarini nokautga uchratgan bo‘lsa, ikki bahsda ochkolar hisobida g‘alaba qozongan. Metin himoya va kuchli zarbaga ega bo‘lgan charm qo‘lqop ustamiz, o‘zining so‘nggi jangini joriy yilning 17 yanvar (Toshkent vaqti bilan 18 yanvar) kuni meksikalik Adrian Estrellaga qarshi o‘tkazgan. 10 raund etib belgilangan mazkur bellashuvda yengilmas bokschimiz raqibini dastlabki raundda nokautga uchratgan.

Jahon arenalarida mamlakatimiz sharafi va yurtimiz bayrog‘ini ko‘klarga ko‘tarayotgan Sh.Ergashevning oldinda turgan rejalari ko‘p. U dunyoda pandemiya sabab yuzaga kelgan noqulay vaziyatlar yakunlangach, tez orada jang o‘tkazib, o‘z faoliyatini Amerikada davom ettirib, jahon chempionlik kamarini qo‘lga kiritgandan so‘ng yurtimizga qaytmoqchi.

Uning kelgusidagi rejalari va oldinga qo‘ygan maqsadlari amalga oshishida tilakdoshmiz.

Manba: Sports.uz “Zamin” yangiliklarini “Vkontakti”da kuzatib boring