FIFA milliy jamoalarning yangi reytingini e’lon qildi

^{Foto: O‘FA}
FIFA rasmiy sayti noyabr oyidagi JCH-2022 saralash uchrashuvlari va rasmiy o‘rtoqlik o‘yinlaridan keyingi milliy jamoalarning yangilangan reytingini e’lon qildi.

Unga ko‘ra, O‘zbekiston milliy jamoasi bu safar ham 84-o‘rinda qolgan. Milliy jamoamiz yozda JCH-2022 3-saralash bosqichiga chiqa olmagach, bir pog‘ona pastlab 83-o‘rindan 84-pog‘onaga tushgan edi. Srechko Katanes qo‘l ostida so‘nggi uch oyda 4ta o‘yinda 3 mag‘lubiyat (Shvetsiya 1:2, Iordaniya 0:3, Gruziya 0:1) va bir g‘alaba (Malayziya 5:1) qayd etilishiga qaramay, O‘zbekiston reytingda o‘z o‘rnini saqlab qolgan.

Osiyo mamlakatlari orasida Eron peshqadam (21-o‘rin) bo‘lsa, keyingi o‘rinlardan Yaponiya (26), Janubiy Koreya (33), Avstraliya (35), Saudiya Arabistoni (48), Qatar (51), BAA (70), Xitoy (74), Iroq (75), Ummon (78) va O‘zbekiston (84) qit’ada 11-o‘rinda bormoqda. Bizdan keyin reytingda Osiyodan Suriya (85), Bahrayn (90), Iordaniya (91) va Livan (94) joy olgan.

Jahon reytingida hali hamon Belgiya peshqadam – 1-o‘rin. Braziliya va Fransiya uchlikdan joy olgan bo‘lsa, Angliya, Argentina, Italiya, Ispaniya, Portugaliya, Daniya va Niderlandiya milliy jamoalari o‘nlikdan joy olgan. “Zamin” yangiliklarini “Vkontakti”da kuzatib boring