Superliganing eng chiroyli gol muallifi jamoasini nega o‘zgartirdi?

“Turon” klubi bilan birga bu yil Superligada debyutini o‘tkazgan iste’dodli o‘yinchi Bilolxon Toshmirzayev tezda ko‘zga tashlana boshladi. Chempionatda jamoasi safida 23 ta o‘yinda maydonga tushgan futbolchi faqat bir marta gol urdi. Ammo o‘sha goli O‘zbekistonda 2021 yilning eng chiroyli goliga aylandi.

Superliganing 16-turida “Turon” safarda “Lokomotiv”ga qarshi maydonga tushgandi. O‘sha uchrashuvning 30-daqiqasida Toshmirzayev maydon markaziga yaqin joydan olisdagi darvozani ishg‘ol qilishga muvaffaq bo‘lgan. Lekin o‘yin oxirigacha “Loko” uchta gol urgandi. Xullas, Bilolxonning o‘sha goli yilning eng chiroylisi aylandi. Futbolchi esa undan boshqa gol ham urgani yo‘q.

Bundan tashqari, Bilolxon klubini o‘zgartirdi. 2022 yilni u endi “Qo‘qon-1912” jamoasida o‘tkazishga qaror qildi. Sports.uz muxbiri Toshmirzayev bilan yuqoridagi mavzular bo‘yicha suhbatlashdi.

- “Lokomotiv” darvozasiga urgan golingiz yilning eng chiroylisi deb topildi va buning uchun sizni tabriklayman. Eng chiroyli gollar nominatsiyasi e’lon qilinganida birinchi o‘rinni olishingizni o‘ylaganmisiz?
- Tabrik uchun rahmat. Bilasizmi, o‘sha kiritgan golim men uchun syurpriz bo‘ldi desam ham bo‘ladi. Aslida nominatsiyadagi barcha gollar o‘ziga yarasha chiroyli va jozibali. To‘g‘risini aytadigan bo‘lsam, barcha gollar ham eng chiroyli gol bo‘lishga loyiq edi.

- Ammo sizga nominatsiyalar orasida qaysi gol ko‘proq yoqdi?
- Hamma gol ham chiroyli chiqdi. Shuning uchun barchasi yilning eng chiroyli goli bo‘lishga munosib edi.

- Keling, shu fursatdan foydalanib, o‘sha golingizni esga olsak. “Lokomotiv” darvozasiga maydon markaziga yetmasidan zarba bergandingiz. Bu chinakam tavakkalona zarbamidi yoki hammasini aniq hisob-kitob qilishga ulgurganmidingiz?
- Bu golim tavakkal bo‘lmagan. O‘yindan oldin bosh murabbiyimiz - Igor Shkvirin menga maydon markazidan darvozaga tepishim kerakligi xususida ko‘rsatma bergandi.

- Haqli tarzda eng chiroyli gol muallifiga aylandingiz. Chunki hammaga ham bunday gol urish nasib qilmaydi. Nima deb o‘ylaysiz, yana shunga o‘xshash golni takrorlashingizga ishonasizmi yoki bunisi betakrormi?
- Albatta, men bundan-da, chiroyli gol urishga harakat qilaman. Mana shunday gol urganim va yakunda eng chiroylisi sifatida e’tirof etilgani yangi mavsumda yanada chiroyli gollar urishimga ishonch bag‘ishlaydi.

- Darvoqe, Bilolxon, chempionatimizda yana kimlar maydon markazidan gol urganini bilasizmi?
- Ha, albatta. Men ham bunaqa gollarning ko‘pini ko‘rganman. Misol uchun o‘tgan yili AGMK sardori Sanjar Tursunovning maydon markazidan urgan goli ham yilning eng chiroyli goli bo‘lgan.

- Kuni kecha “Turon”ni tark etib, “Qo‘qon-1912”ga ko‘chib o‘tdingiz. “Turon”dan ketishingiz klubning Superligadan tushib ketgani bilan bog‘liq bo‘lsa kerak-a?
- “Turon” klubini tark etganim yo‘q. Men “Qo‘qon-1912” jamoasiga ijara evaziga o‘tganimni aytmoqchiman.

- Jamoani o‘zgartirish sizning tashabbusingizmi yoki klublar o‘zaro kelishishdimi?
- Bu masalada har ikkala jamoa kelishib oldi.

- Xizmatingizga boshqa jamoalardan ham qiziqarli takliflar bormidi?
- Rostini aytaman, menga Superliga klublaridan ko‘plab takliflar kelib tushdi. Albatta, yana “Turon” jamoasida qolishim ham mumkin edi. Ammo men Superligada o‘ynamoqchiligimni aytdim. Istaklarimni to‘g‘ri tushunib, meni “Qo‘qon-1912”ga ijaraga bergan “Turon” rahbariyatiga minnatdorchiligimni bildirmoqchiman.

- U yerga o‘tishdan avval bosh murabbiy Baxtiyor Ashurmatov bilan gaplashdingizmi? “Qo‘qon-1912” jamoasining nimasi sizni o‘ziga jalb qildi?
- Barchasi rahbariyat o‘zlariga begona bo‘lmagan “Qo‘qon-1912” rahbarlari bilan kelishgan holda bo‘ldi. Baxtiyor Ashurmatov albatta tajribali mutaxassis. O‘ylaymanki, kelgusi mavsum yuqori o‘rinlarni olib “Qo‘qon-1912” ishqibozlarini xursand qilamiz.

“Zamin” yangiliklarini “Twitter”da kuzatib boring