Superliga klublari uchun 2022 yilgi qishki transferlar oynasi yopilish arafasida. Jamoalar shu vaqtga qadar o‘zlari uchun zarur bo‘lgan futbolchilarni qo‘shib olishdi. Saytimiz esa qishda amalga oshirilgan eng yaxshi transferlarning 10 taligini tuzishga qaror qildi.
1. Jamshid Iskanderov. "Seongnam" > "Navbahor"
Transferlar oynasida ommaning nigohini o‘ziga qaratgan "Navbahor" safiga Jamshid Iskanderov ham kelib qo‘shildi. Ortda qolgan ikki mavsumni Janubiy Koreyaning "Seongnam" jamoasida o‘tkazgan yarim himoyachi bundan buyon Samvel Babayan qo‘l ostida to‘p tepadi. Yarim himoya chizig‘ida Azim Ahmedov bilan birgalikda yetakchilikni qo‘lga olishi kutilayotgan futbolchidan mahalliy ishqibozlarning umidi katta. Zero aqlli va o‘ylangan paslar, hujum chizig‘i vakillarini to‘p bilan ta’minlash qobiliyatiga ega Iskanderov ishonchlarni oqlashga harakat qilishi tabiiy.
2. Alisher Jalilov. "Istiqlol" > AGMK
Tarkibda ko‘p yo‘qotishlarga uchragan olmaliqliklar ketganlarning o‘rnini munosib to‘ldirishga urinishdi. To‘g‘ri, "Navbahor" singari ko‘p xaridlar qila olmagandir, lekin kerakli va muhim futbolchilar bilan shartnoma imzoladi. Ulardan biri Tojikistonning "Istiqlol" jamoasi yarim himoyachisi Alisher Jalilov transferidir. Uning dushanbeliklar tarkibida nimalarga qodirligini mamlakatimiz klublariga qarshi kechgan o‘yinlarda ko‘rganmiz. Alisher Jalilov AGMKda ham shunday o‘yin namoyish qila oladimi? Buni mavsum davomida bilib olishimiz mumkin.
3. Anzur Ismoilov. "Paxtakor" > AGMK
Bir necha mavsumdan beri markaziy himoya chizig‘ida kamchiliklar kuzatilayotgan AGMK 2022 yilga kelib mazkur muammoga barham bergan ko‘rinadi. Anzur Ismoilovdagi boy tajriba va malaka bunda katta ahamiyat kasb etishi shubhasiz. Bosh murabbiy Mirjalol Qosimov mudofaa chizig‘idagi kemtiklikni Ismoilov va Mishenko yordamida hal qilsa ajab emas.
4. Sardor Rashidov. "Kuvayt SK" > "Paxtakor"
2021 yilda "Paxtakor"da qisqa vaqt to‘p tepib Quvayt chempionati vakili "Quvayt SK" jamoasiga yo‘l olgan Sardor Rashidov qishki transferlar oynasida yana "sherlar" safiga qaytdi. To‘g‘ri jamoaning yarim himoyasida o‘yinchilar yo‘q emas. Deylik Xojimat Erkinov, Diyor Holmatov singari yosh ijrochilar topiladi. Ammo OCHLda ishtirok etadigan "Paxtakor" uchun tajribali va mahoratli futbolchi kerak edi. Rashidov bu borada ayni muddao.
5. Temurxo‘ja Abduxoliqov. "Lokomotiv" > "Qizilqum"
"Qizilqum" yangi mavsum starti oldidan hujumchi Temurxo‘ja Abduxoliqovni o‘z futbolchisi sifatida tanishtirdi. Nomdor forvardda so‘nggi mavsumlarda sermahsullik tushib borayotgandi. Balki jamoasini o‘zgartirgani foydaga ishlar. Har holda u "Qizilqum"da yolg‘iz emas, atrofida bir nechta sobiq "temiryo‘lchilar" bor.
6. Ikrom Aliboyev. "Tedjon" > "Paxtakor"
Yuqorida aytganimizdek, "Paxtakor" OCHLda xizmat qiladigan tajribali futbolchilarni olishi shart hisoblanardi. Rashidov bilan birgalikda Ikrom Aliboyev "Paxtakor" yarim himoyasida yaxlitlik hosil qilishadi. Taxminimizcha ,Slavche Voyneski Dragan Cherandan hujumchi rolida foydalansa, Aliboyev markazdan o‘rin oladi. Bu borada taktik o‘zgarishlarni ham qo‘llash nisbatan osonroq kechadi. Aliboyevdagi nostandart qarorlar, hujumga tez qo‘shilish kabi xislatlar "sherlar"ga muhim pallada samara keltirishi mumkin.
7. Zoran Marushich. "Dinamo Tbilisi" > "Navbahor"
"Navbahor" va nihoyat hujumchiga yolchidi deb o‘ylaymiz. O‘tgan yili aynan forvard masalasida aziyat chekkan "lochinlar" legioner hujumchini jalb qildi. Gruziya chempionatining eng yaxshi hujumchisi Turkiyadagi yig‘inlar chog‘ida ham o‘zini ko‘rsata oldi. Zoran Marushich "Navbahor"ning hujumdagi muammolarining yechimi bo‘lib chiqsa ne ajab. Ko‘ramiz va kuzatamiz.
8. Ivan Solovyov. "Navbahor" > "Nasaf"
Qarshining "Nasaf" jamoasi o‘tgan yilgi tarkibni saqlab qolishga erishgani bois transferlarda faol bo‘lgani yo‘q. Ro‘ziqul Berdiyev bu masalada ehtiyotkor va aql bilan ish tutdi, deya olamiz. Jamoaga taklif etilgan rossiyalik yarim himoyachi Ivan Solovyov yarim himoyadagi raqobatni oshishiga xizmat qiladi.
9. Lutfulla To‘rayev. "Bunyodkor" > "Neftchi"
Ko‘pchilik shu kungacha Lutfulla To‘rayevni yoshi katta, qariya deb atab keldi. Lekin uning maydonda qilayotgan ishi yosh futbolchilardan kam emas. O‘yinni qo‘lga olish, futbolchilarni ortidan ergashtirish, maydondagi "dispetcherlik" "Neftchi"ga qo‘l keladi. Ilhom Mo‘minjonov tomonidan amalga oshirilgan eng yaxshi transfer muammosiz Lutfulla To‘rayev bo‘ldi.
10. Elguja Grigalashvili. "Qizilqum" > "Navbahor"
Elguja Grigalashvili bitta so‘z bilan aytganda, maydondagi jangchi va kayfiyat o‘yinchisi. "Navbahor"ga aynan shunday tipdagi o‘yinchi yetishmayotgandi. Samvel Babayan buni payqadi va gruziyalik futbolchini jamoaga chorladi. O‘ylaymizki, Grigalashvili namanganliklar uchun foydali transfer.
Bular shunchaki mavsumoldi yuritilgan mulohazalar. Birinchi davra yakunida yana bu borada xulosalarimizni taqdim qilamiz.
Muallif: Iskandarov Abdulaziz
“Zamin” yangiliklarini “Telegram”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
Raqobat qo‘mitasi birjada Ai-80 benzini boshlang‘ich narxiga cheklov o‘rnatdi
Trampning o‘g‘li Zelenskiy yaqin orada «nafaqadan» mahrum bo‘lishini yozdi
Immunitetni ko‘tarish uchun 6 ta eng yaxshi vitamin
Shavkat Mirziyoyev: “Falastinlik bolalar va ayollarni beg‘araz davolashga tayyormiz”
Erdo‘g‘on Turkiya Isroil bilan aloqalarini uzganini ma’lum qildi
Samarqandda voyaga yetmagan qizni zo‘rlaganlikda gumonlanib 8 kishi ushlandi
Jaloliddin Masharipov: "Qatar ustidan g‘alaba qozonsak, Jahon chempionati masalasini 90 foizga hal etamiz"
AQSHda Tramp siyosatidan qochmoqchi bo‘lganlarga 4 yillik sayohat taklif qilindi
