Hasanboy Doʻsmatov Parij Olimpiadasida qatnashmoqchi ekanini aytdi

Xabaringiz bor, Bolgariyaning sofiya shahrida tashkil etilgan, "Stranja" turnirida Oʻzbekiston terma jamoasi muvaffaqiyatli ishtirok etib, 6 ta oltin va bitta bronza medalini qoʻlga kiritgan holda, umumjamoa hisobida 1-oʻrinni qoʻlga kiritgan edi.

Aynan, oltin medalarning birini -51 kg vazn toifasida yurtimiz sharafini himoya qilgan Rio Olimpiadasi chempioni Hasanboy Doʻsmatov delegatsiyamizga taqdim etdi.

Biz bugun tongda yurtimizga etib kelgan bokschimiz bilan bogʻlanib, uning turnir va kelajakdagi rejalari bilan qiziqdik.

- Avvalo, bildirilgan ishonchni oqlaganimizdan xursandman. Nazarimda murabbiylarning ishonchi yanada oshdi, deb aytishim mumkin. Albatta, "Stranja" turniri kichik jahon chempionatiga qiyoslanadi. Barcha terma jamoalar yosh iste'dodlarni va oʻz oʻrnida kuchli tarkibni jalb etishdi. hattoki, Rossiya va Qozogʻiston terma jamoalari 2 tarkib bilan ishtirok etdi.

Barcha janglar oʻziga yarasha qiyin oʻtdi, deb ayta olaman. Duch kelgan raqiblarimning barchasi bilan ilk janglarim edi. Tajriba qoʻl kelib, ularni magʻlub eta oldim, degan fikrdaman. Asosiysi oʻzimni ham sinab oldim. Mazkur turnirdan soʻng, niyatim ham oʻzgardi. Ya'ni oldinda turgan Osiyo oʻyinlari, Osiyo chempionati, Jahon chempionati hamda Parij Olimpiadasida ham ishtirok etishni maqsad qildim.

Albatta, murabbiylar ishonch bildirsa, ushbu niyatlarim amalga oshishi mumkin. Sababi, Olimpiadaga yangi vazn -51 kg qoʻshiladigan boʻlmoqda. -52 emas -51 kgda janglar boʻlishi kutilmoqda. Shubhasiz, bu vazn toifasida oʻzimni anchagina erkin his qilaman. Agar, buning imkoni boʻlmasa, bor e'tiborimni professional boksga qarataman. Umuman olib qaraganda har ikkisini bir vaqtda olib borish istagidaman. Professional boksda bir yilda 2 marotaba jang berishadi va bu yoʻnalishda ham oʻzimni koʻrsatib, barchani xursand qilaman, degan umiddaman. “Zamin” yangiliklarini “Telegram”da kuzatib boring