Yevropa parlamenti sun’iy intellekt to‘g‘risidagi qonunni qabul qildi

^{Foto: Alexander / Adobe Stock}
Yevropa parlamenti sun’iy intellektdan (SI) foydalanishni tartibga soluvchi qonunni ma’qulladi. Bu sun’iy intellektni nazorat qilish bo‘yicha dunyodagi birinchi «qoidalar to‘plami» ekani ta’kidlanmoqda.

Tashabbusning maqsadi «inson huquqlari, demokratiya, qonun ustuvorligi va ekologik barqarorlikni yuqori xavfli sun’iy intellektdan himoya qilish, shuningdek, innovatsiyalarni rag‘batlantirish va Yevropani bu sohada yetakchi qilish», deyiladi Yevropa parlamenti bayonotida.

Qonunda sun’iy intellektga asoslangan texnologiyalarga xavf toifalari ajratilishi belgilab qo‘yilgan: qabul qilib bo‘lmaydigan (bu holda texnologiya taqiqlanadi), yuqori, o‘rta va past.

Yangi qonunga ko‘ra, quyidagilar taqiqlanadi: real vaqt rejimida yuzni aniqlash, ish joyi va maktablarda odamlarning his-tuyg‘ularini aniqlash, ijtimoiy reyting va inson xatti-harakatlarini manipulyatsiya qiluvchi yoki zaifliklaridan foydalanuvchi SI texnologiyalari.

Umumiy maqsadli SI tizimlari ma’lum shaffoflik talablariga javob berishi kerak. SI tomonidan qayta ishlangan barcha tasvirlar, audio yoki videoyozuvlar («dipfeyklar») tegishli belgiga ega bo‘lishi talab qilinadi.

Hujjat hali Yevropa Kengashi tomonidan tasdiqlanishi kerak. U may oyi oxirida kuchga kirishi kutilmoqda.

Yevroparlament rahbari Roberta Metsola so‘zlariga ko‘ra, qonun Yevropa Ittifoqi fuqarolarining asosiy huquqlarini himoya qilish bilan birga innovatsiyalarga yordam beradi.

«Sun’iy intellekt allaqachon kundalik hayotimizning muhim qismiga aylangan. Endi bu bizning qonunchiligimiz bilan tartibga solinadi», dedi u. “Zamin” yangiliklarini “Odnoklassniki”da kuzatib boring