Tramp qarorgohini robot itlar qo‘riqlamoqda (video)

^{Kollaj: New York Post}
AQSH Maxfiy xizmatlari safiga Boston Dynamics kompaniyasi tomonidan ishlab chiqarilgan birinchi robot-it qo‘shildi. Bu haqda BBC xabar berdi.

Ulardan biri Florida shtatining Palm-Bich shahridagi saylangan prezident Donald Trampning Mar-a-Lago qarorgohi hududida patrullik qilmoqda. To‘rt oyoqli patrul robotning nomi — Spot — so‘z o‘yini asosida tanlangan. Ingliz tilida “spot” nafaqat “nuqta” yoki “dog‘” ma’nosidagi ot, balki fe’l sifatida “topmoq” yoki “kuzatmoq” ma’nosida ham qo‘llaniladi.

Elektron it to‘liq avtomatlashtirilgan holda oldindan belgilangan yo‘nalishda harakatlanishi yoki masofadan boshqariluvchi rejimda ishlashi mumkin. Har bir metall oyoqda “Silamang!” degan ogohlantiruvchi yozuv bor.

"Kim bunday itni silashni xohlashini tushunmayman. U umuman yoqimtoy emas”, deydi Kaliforniyadagi Menlo xususiy kollejining siyosatshunosi Melissa Michelson.

"Bizning asosiy ustuvor vazifamiz — saylangan prezidentning xavfsizligi", deydi AQSHning jamoatchilik bilan aloqalar bo‘yicha maxfiy xizmati rahbari Entoni Gulelmi.

So‘nggi bir necha oy ichida AQSHdagi saylovoldi kampaniyasi davomida Trampning hayotiga ikki marta ommaviy suiqasd uyushtirildi. Birinchi marta iyulda, Pensilvaniyada saylovchilar bilan uchrashuvda; ikkinchisi sentyabrda, Mar-a-Lagodagi golf maydonida yuz berdi.
“Zamin” yangiliklarini “Telegram”da kuzatib boring