Xitoylik olimlar hayvonlar ovozini inson tiliga o‘giruvchi dastur bo‘yicha ish boshlandi

Xitoyning yetakchi texnologik kompaniyalaridan biri bo‘lgan Baidu hayvonlarning tovushlari va xatti-harakati orqali ularning ehtiyoj va his-tuyg‘ularini aniqlay oladigan sun’iy intellekt asosidagi tarjimonni ishlab chiqmoqda. Ushbu innovatsion texnologiyaning patenti South China Morning Post nashri jurnalistlari tomonidan topildi.

Tizim tovush signallari, jismoniy harakatlar va hayvonlarda kuzatiladigan biologik o‘zgarishlarni tahlil qilish uchun sun’iy intellektdan foydalanadi. Bu esa insonlarga o‘z uy hayvonlari bilan muloqotni osonlashtirishi mumkin.

Aytish kerakki, mazkur texnologiya hali "Doktor Dulittl" uslubidagi bevosita so‘zma-so‘z muloqotni va’da qilmayapti. Biroq, bu tizim orqali uy hayvonlarining och qolgani, noqulaylik his qilayotgani yoki o‘z egasining e’tiborini xohlayotganligini tushunish mumkin bo‘ladi. Tarjimon hayvonlarning tovush ohangi, tana holati, xatti-harakati va boshqa muhim belgilarni o‘rganish orqali ma’lumotni aniqlaydi.

Bu yo‘nalishdagi ilk tadqiqot emasligini ham qayd etish zarur. Masalan, Yaponiya olimlari tomonidan itlar ovozini talqin qiluvchi qurilma ishlab chiqilgan va ushbu ixtiro Time jurnali tomonidan 2002 yilning eng yaxshi ixtirolaridan biri sifatida tan olingan edi. Ammo ushbu loyihalar hali to‘liq mukammal darajaga yetmagan.

Baidu kompaniyasi ushbu loyihani muvaffaqiyatli amalga oshira olsa, bu uy hayvonlari egalari uchun katta yutuq bo‘lishi mumkin. Ular o‘z yoqimli do‘stlarining ehtiyojlari va kayfiyatini aniqroq tushunib, ular bilan yanada yaqin aloqalarni o‘rnatish imkoniga ega bo‘ladilar.

Hozircha ushbu texnologiyaning qaysi bosqichda ekanligi va amaliyotda qachon foydalanishga topshirilishi haqida ma’lumot berilmagan. Ammo bu kabi texnologiyalarning paydo bo‘lishi kelajakda inson va hayvonlar o‘rtasidagi munosabatlarda yangi sahifa ochishi mumkinligiga ishora qilmoqda. “Zamin”ni Telegramʻda oʻqing!