Xitoyda 2030 yilgacha osmonda dron-taksilar paydo bo‘ladi

Yaqin besh yil ichida Xitoy shaharlari havo transport xizmatlarining yangi davriga qadam qo‘yishi mumkin. Aviatsiya sohasidagi innovatsiya va texnologiyalarga ixtisoslashgan EHang startapi 2030 yilga qadar Xitoy osmonida “parvoz qiluvchi yo‘nalishli taksilar” faol harakatlana boshlashini bildirdi. Bu haqda kompaniya moliyaviy direktori Konor Yan South China Morning Post nashriga bergan intervyusida ma’lum qildi.

Yo‘lda emas, osmonda — yangi davr

Kompaniya vakiliga ko‘ra, katta shaharlarda infratuzilma, jumladan uchish-qo‘nish maydonchalari mavjud bo‘lsa, bunday xizmatlarni nafaqat yo‘nalishli, balki individual tarzda ham joriy etish mumkin. EHang buni nafaqat ehtimol sifatida, balki to‘liq ishonch bilan bayon qilmoqda. Yan “2030 yilga qadar bunday dron-taksilarning Xitoyda keng tarqalishiga ishonaman”, deb ta’kidladi.

EH216-S — sayyohlar uchun osmondagi sayohat

EHang o‘zining EH216-S modelidagi elektr uchish apparatlarini joriy yil oxirigacha sayyohlik maqsadlarida ishga tushirishni rejalashtirmoqda. Bu dronlar Guanchjou va Xefey kabi shaharlarda diqqatga sazovor joylar ustida sayr qilishga xizmat qiladi. Biroq, hozircha bu faqat aniq belgilangan yo‘nalishlar bo‘yicha amalga oshiriladi.

EH216-S modelining maksimal parvoz masofasi 30 kilometrni, tezligi esa soatiga 130 km ni tashkil etadi. Narxi 331 ming dollar etib belgilangan va u ikki yo‘lovchini olib o‘tish imkoniyatiga ega.

Tailand va eksport bozorlari

EH216-S nafaqat Xitoyda, balki boshqa davlatlarda ham qiziqish uyg‘otmoqda. Xususan, Tailandda sinov parvozlari o‘tgan yilning noyabrida boshlangan va tez orada bu yerda ham xizmatlar joriy etilishi mumkin. Shuningdek, Yaqin Sharq, Janubi-Sharqiy Osiyo va Lotin Amerikasi mamlakatlaridan dronlarga talab yuqori.

EHang raqobatdan cho‘chimasligini bildirmoqda, chunki dronlar segmenti global miqyosda ulkan salohiyatga ega. Kompaniya o‘zini bozorda yetakchilardan biri sifatida ko‘radi va bu pozitsiyani ushlab turish niyatida.

Hamkorlik va rivojlanish yo‘li

EHang o‘zining ishlab chiqarish quvvatini kengaytirish ustida ham ishlamoqda. Joriy yil oxirigacha kompaniya yiliga 300 ta o‘rniga 1000 ta uchish apparati ishlab chiqarishni maqsad qilgan. Bu borada Gotion kabi batareya ishlab chiqaruvchilari, Changan Automobile kabi yirik avtomobil kompaniyalari bilan hamkorlik qilinmoqda.

Shuningdek, kompaniya bir nechta yangi batareya modelini yaratish ustida ish olib bormoqda. EHang AKSH fond bozorida ham faoliyat yuritmoqda va endi aksiyalarni boshqa birjaga joylashtirishni ham ko‘rib chiqmoqda.

Yangi apparatlar: VT-35 hozirlanmoqda

Kompaniya EH216-S ortidan yangi mahsulot — VT-35 uchish qurilmasini taqdim etadi. U o‘rta masofalar — taxminan 300 km gacha bo‘lgan yo‘nalishlar uchun mo‘ljallangan. Bu apparat oldingi VT-30 modelining evolyutsion davomchisidir va elektr energiyasini samarali sarflash hamda yuqori kreyser tezligini ta’minlash uchun qayta ishlangan.

Zamin.uz tahririyati EHang loyihasi ortidan kuzatuvni davom ettiradi. Siz ushbu osmondagi taksi xizmatini sinovdan o‘tkazishga tayyormisiz?

Foto: South China Morning Post “Zamin”ni Telegramʻda oʻqing!