O‘zbekistonda Nvidia’dan ikki sun’iy intellekt klasteri yaratiladi

O‘zbekiston sun’iy intellekt va infratuzilmani raqamlashtirish sohasida bir qator strategik loyihalarni amalga oshirish jarayonida bo‘lib, bu borada AQShning Nvidia texnologik korporatsiyasi asosiy hamkor sifatida ishtirok etmoqda. O‘tgan hafta O‘zbekiston raqamli texnologiyalar vaziri Sherzod Shermatovning AQShga tashrifi chog‘ida kompaniya rahbariyati bilan muzokaralar o‘tkazildi.

Kun tartibida mamlakatning texnologik rivojlanishiga turtki beruvchi bir nechta tashabbuslar muhokama qilindi. Xususan, umumiy quvvati 1 megavatt bo‘lgan ikkita yuqori samarali hisoblash klasterini yaratish masalasi ko‘rib chiqildi.

Ushbu resurslar ikki asosiy yo‘nalish bo‘yicha taqsimlanadi. Birinchi klaster ta’lim sohasi va ilmiy tadqiqotlar uchun mo‘ljallangan bo‘lib, bu yangi avlod kadrlari tayyorlash va zamonaviy ilmiy izlanishlar olib borishga yordam beradi.

Ikkinchi klaster esa sun’iy intellektning iqtisodiyot va ijtimoiy hayotga keltiradigan katta foydasini hisobga olgan holda, raqamli hukumat, sog‘liqni saqlash, bank sektori va sanoat kabi muhim sohalardagi loyihalarga xizmat qiladi. Mazkur loyihalar bo‘yicha yakuniy kelishuvlar 2026 yilga qadar imzolanishi kutilmoqda.

Vazirlik vakillari ta’kidlashicha, shartnomalar tuzishning aniq muddati ikki asosiy omilga bog‘liq: zarur yuqori texnologik uskunalarning xalqaro bozorda mavjudligi va AQSh hukumati bilan eksport nazorati masalalarini kelishish jarayoniga. Infratuzilmani rivojlantirish bilan bir qatorda, kadrlar salohiyatiga ham katta e’tibor qaratilmoqda.

O‘zbekistonda sun’iy intellekt sohasida ilg‘or tajriba markazi sifatida “AI Center of Excellence” ta’lim majmuasi ishga tushiriladi. Ushbu loyihaning umumiy qiymati 3 million dollarni tashkil qiladi.

Markazning asosiy vazifasi sun’iy intellekt bo‘yicha bilimlarni oliy ta’lim muassasalariga yetkazib beradigan o‘qituvchilarni tayyorlash va turli sohalar mutaxassislari uchun malaka oshirish kurslarini yo‘lga qo‘yishdan iborat. Bundan tashqari, hukumat mamlakatning yetakchi universitetlarini Nvidia tomonidan taqdim etiladigan sun’iy intellekt asosidagi superkompyuter infratuzilmasi bilan jihozlashni rejalashtirmoqda.

Bu tashabbus universitetlarda zamonaviy hisoblash quvvatlarini yaratish va ilmiy tadqiqotlar hamda amaliyot uchun imkoniyatlar taqdim etishga qaratilgan. Tegishli kelishuvni imzolash 2025 yil oxiriga qadar rejalashtirilgan.

Shuningdek, hamkorlikning muhim qismi tajriba almashishdan iborat bo‘ladi. Nvidia O‘zbekiston tomoniga sun’iy intellektni boshqarish, uni iqtisodiyotning turli sohalarida samarali qo‘llash va sun’iy intellekt ekotizimini rivojlantirish strategiyalarida dunyodagi eng yaxshi amaliyotlar bo‘yicha ochiq ma’lumotlarni taqdim etadi.

“Zamin”ni Telegramʻda oʻqing!