"Microsoft" korporatsiyasi o'z tarixida ilk bor AQShdagi 9 mingga yaqin xodimiga kompensatsiya to'lovi evaziga o'z xohishi bilan ishdan ketishni taklif qilmoqda. Mazkur tashabbus kompaniya biznesini keng ko'lamli qayta qurish va sun'iy intellekt texnologiyalarini jadal joriy etish strategiyasining bir qismi hisoblanadi. Infratuzilmaviy xarajatlarning ortishi rahbariyatni shtat birliklarini optimallashtirishga majbur qilmoqda.
Yangi dastur barcha xodimlarga emas, balki ma'lum mezonlarga javob beradigan mutaxassislarga mo'ljallangan. Unga ko'ra, lavozimi katta direktor darajasidan yuqori bo'lmagan hamda yoshi va kompaniyadagi ish staji yig'indisi 70 yil va undan ortiqni tashkil etgan xodimlar ixtiyoriy ravishda nafaqaga chiqishlari mumkin. Bu taklif asosan korporatsiyada uzoq yillar davomida faoliyat yuritgan tajribali kadrlarga qaratilgan.
Ekspertlarning ta'kidlashicha, texnologiya giganti ushbu qadam orqali resurslarni sun'iy intellekt yo'nalishiga qayta yo'naltirishni maqsad qilgan. Hozircha ushbu taklifni qancha xodim qabul qilishi va bu jarayon kompaniyaning kelgusi moliyaviy ko'rsatkichlariga qanday ta'sir ko'rsatishi ochiqlanmagan. Kompaniya rahbariyati ushbu chora biznes samaradorligini oshirish uchun zarurligini qayd etmoqda.
“Zamin”ni Telegramʻda oʻqing!
