Iordaniya Oy, Mars, kometa va asteroidlarni tinch maqsadlarda o'zlashtirish bo'yicha prinsiplarni belgilovchi Artemis Accords xalqaro kelishuvini rasman imzoladi. Vashingtonda bo'lib o'tgan marosimda hujjatni Iordaniyaning AQShdagi elchisi Dina Kavar imzoladi. Bu haqda Ixbt.com xabar beradi.
Shu tariqa, mamlakat ushbu global tashabbusning 63-ishtirokchisiga aylandi.
Artemis kelishuvlari 2020 yilda ishga tushirilgan bo'lib, 1967 yildagi Koinot to'g'risidagi shartnoma prinsiplariga asoslanadi. Hujjat koinotdan tinch maqsadlarda foydalanish, texnologiyalar mosligi, ilmiy ma'lumotlar almashinuvi va koinot chiqindilarini kamaytirish kabi muhim qoidalarni o'z ichiga oladi.
Garchi kelishuv majburiy xarakterga ega bo'lmasa-da, u ishtirokchi davlatlar uchun umumiy qoidalar to'plamini shakllantiradi.
NASA rahbari Jared Ayzekmanning ta'kidlashicha, Iordaniyaning qo'shilishi insoniyatning Oyga qaytishi va u yerda doimiy infratuzilma yaratish jarayoni yangi bosqichga chiqayotgan davrga to'g'ri keldi. Iordaniya 2026 yil hisobidan Portugaliya, Ummon va Latviyadan keyin ushbu kelishuvga qo'shilgan to'rtinchi davlat bo'ldi.
Mamlakat o'z koinot dasturini izchil rivojlantirib kelmoqda. 2018 yilda talabalar tomonidan yaratilgan JY1 nomli birinchi Iordaniya sun'iy yo'ldoshi SpaceX kompaniyasining Falcon 9 raketasi yordamida orbitaga chiqarilgan edi.
Shuningdek, hozirda Vadi-Ram cho'lida koinot missiyalarining yer ustidagi analoglarini sinovdan o'tkazish loyihalari amalga oshirilmoqda.
“Zamin”ni Telegramʻda oʻqing!
