Signal65 kompaniyasi tomonidan Microsoft buyurtmasiga binoan oʻtkazilgan yangi tadqiqot Windows 11 operatsion tizimida ishlovchi arzon noutbuklar MacBook Neoʼga nisbatan yuqori unumdorlik va batareya quvvatini taqdim etishi mumkinligini koʻrsatdi. Hisobotga koʻra, narxi MacBook Neoʼdan 150 dollarga arzonroq boʻlgan qurilmalar Procyon Office Productivity testlarida 56 foizgacha yaxshiroq natija qayd etgan. Bu haqda Ixbt.com xabar beradi.
Taqqoslash uchun Lenovo IdeaPad Slim 3x, HP OmniBook 5, Lenovo Yoga 7i va HP OmniBook X Flip modellari tanlab olindi. 450 dollarlik Lenovo noutbuki Snapdragon X platformasida, HP modeli esa Ryzen AI 7 350 protsessorida ishlaydi. Cinebench 2026 testlarida ushbu qurilmalar MacBook Neoʼdan deyarli ikki barobar yuqori natija koʻrsatgani qayd etilgan, biroq boshqa testlarda farq biroz kamroq.
Bundan tashqari, arzonroq Windows noutbuklari koʻproq operativ xotira, kengroq SSD sigʻimi va zamonaviy Wi-Fi 7 standartini qoʻllab-quvvatlashi bilan ajralib turadi. Biroq, tadqiqotda ekran sifati, korpus materiallari, dizayn va qurilmaning ogʻirligi kabi muhim jihatlar eʼtibordan chetda qolgan.
Mutaxassislar ushbu natijalarni tahlil qilar ekan, Microsoft tomonidan moliyalashtirilgan tadqiqotda faqat unumdorlik va avtonomlikka urgʻu berilganini taʼkidlashmoqda. Shunga qaramay, Windows 11 platformasidagi noutbuklar narx va imkoniyatlar nisbati boʻyicha raqobatbardosh ekanligi yana bir bor tasdiqlandi.
“Zamin”ni Telegramʻda oʻqing!
