Rossiyada maishiy texnika ishlab chiqaruvchilarining 2025-yil yakunlari bo‘yicha tushumi 11,6 foizga qisqarib, 209,2 milliard rublni tashkil etdi. Tahlilchilar ushbu pasayishni umumiy talabning kamayishi va bozorning torayishi bilan izohlamoqda. Bu haqda Ixbt.com xabar beradi.
Bozordagi eng yirik ishlab chiqaruvchilar qatoriga Haier, LG, Beko, Indesit, Hotpoint va Biryusa brendlari ostida texnika tayyorlaydigan kompaniyalar kiradi. Shunga qaramay, faqat ikkita korxona — Indesit, Hotpoint va Stinol texnikalarini ishlab chiqaruvchi Lipetsk zavodi hamda mahalliy Biryusa brendi o‘sish ko‘rsatkichlarini qayd etdi.
Beko kompaniyasining Rossiyadagi bo‘linmasi esa aksincha, 35 foizga yaqin daromad yo‘qotdi. Mutaxassislarning fikricha, Biryusa zavodi bojxona to‘lovlarining yo‘qligi va arzon narxdagi muzlatgichlar segmentiga qaratilgan strategiyasi tufayli raqobatda ustunlikka erishmoqda.
Bozordagi pasayish tendensiyasi biznesni qayta tashkil etish va savdo sxemalarining o‘zgarishi bilan ham bog‘liq. Xorijiy brendlar ketganidan so‘ng, texnikalarning katta qismi mahalliy distribyutorlar orqali sotilmoqda. Shunga qaramay, ekspertlar 2026-yilda maishiy texnika bozorida bosqichma-bosqich tiklanish kuzatilishini kutmoqda.
“Zamin”ni Telegramʻda oʻqing!
