Rossiya huquq-tartibot organlari «Gosuslugi» portalidagi shaxsiy kabinetlarga noqonuniy kirish sxemasini fosh qildi. Tergov ma’lumotlariga ko‘ra, Kabardin-Bolqoriyada yashovchi 33 yoshli MFT xodimi internetda akkauntlarga kirishni tiklash bo‘yicha pullik xizmatlar ko‘rsatgan. Bu haqda Ixbt.com xabar beradi.
Jinoyatchi mijozlardan uchinchi shaxslarning pasport ma’lumotlari, SNILS va telefon raqamlarini olib, atigi 300 rubl evaziga begona akkauntlarga kirish huquqini taqdim etgan. Ushbu sxemadan foydalangan Yekaterinburg fuqarosi Surgutlik shaxs nomiga raqamli bank kartasini rasmiylashtirib, uni sotib yuborgan.
Firibgarlar jabrlanuvchi nomiga 70 ming rubl miqdorida onlayn kredit olmoqchi bo‘lishgan, biroq jabrlanuvchida kredit olishga oldindan o‘rnatilgan taqiq mavjudligi sababli bu urinish muvaffaqiyatsiz yakunlangan.
Politsiya tomonidan o‘tkazilgan tintuvlar davomida 20 ga yaqin mobil telefon, bank kartalari va tergov uchun muhim bo‘lgan boshqa ashyoviy dalillar musodara qilindi. Hozirda kompyuter ma’lumotlariga noqonuniy kirish va o‘g‘rilikka urinish moddalari bo‘yicha jinoiy ish qo‘zg‘atilgan.
Gumondorlardan biri hibsga olingan, ikkinchisi esa yashash joyidan chiqmaslik haqidagi tilxat bilan ozodlikda qolmoqda. Tergov harakatlari davom etmoqda.
“Zamin”ni Telegramʻda oʻqing!
