SpaceX kompaniyasining V3 avlodiga mansub ilk Starship kosmik kemasi — Ship 39 o‘zining Super Heavy Booster 19 tezlatgichi bilan birlashtirish uchun Pad 2 maydonchasiga yetkazildi. Ushbu juftlik Flight 12 missiyasi doirasida koinotga parvoz qilishi rejalashtirilgan bo‘lib, dastlabki ma’lumotlarga ko‘ra, start 15-may sanasiga belgilangan. Bu haqda Ixbt.com xabar beradi.
Yangi Starship tizimi avvalgi versiyalarga nisbatan sezilarli darajada takomillashtirilgan. Uchinchi avlod raketasi balandligi 124,4 metrga yetadi, shuningdek, u yengilroq va kuchliroq hisoblanadi. Uning yuk ko‘tarish qobiliyati 100 tonnadan oshadi, bu esa V2 avlodidagi 35 tonnalik ko‘rsatkichdan ancha yuqoridir.
Texnik yangilanishlar qatoriga tashqi quvurlarsiz Raptor 3 dvigatellari, optimallashtirilgan issiqlik himoyasi va yonilg‘i quyish portlari kiradi. Shuningdek, tezlatgich konstruksiyasi o‘zgartirilib, qanotlar soni to‘rttadan uchtaga qisqartirildi va yonilg‘i sig‘imi 4050 tonnagacha oshirildi.
Super Heavy Booster 19 tezlatgichi allaqachon Starbase maydonchasida 33 ta Raptor 3 dvigatellari bilan statik sinovdan o‘tdi. Garchi sinov jarayonida suv ta’minoti tizimida kutilmagan uzilishlar yuz bergan bo‘lsa-da, SpaceX muhandislari barcha texnik muammolarni bartaraf etib, parvozga tayyorgarlikni davom ettirmoqda.
“Zamin”ni Telegramʻda oʻqing!
