AMD kompaniyasi o‘zining FSR 4 sun’iy intellektga asoslangan tasvirni yaxshilash texnologiyasini eski avlod grafik kartalariga ham joriy etishga tayyorgarlik ko‘rmoqda. Kompaniya vitse-prezidenti Jack Huynh ma’lum qilishicha, FSR 4.1 versiyasi Radeon RX 7000 (RDNA 3) turkumidagi videokartalar uchun iyul oyida, Radeon RX 6000 (RDNA 2) seriyasi uchun esa 2027-yil boshida taqdim etiladi. Bu haqda Ixbt.com xabar beradi.
Dastlab FSR 4 texnologiyasi faqat RDNA 4 arxitekturasiga asoslangan Radeon RX 9000 seriyasi uchun mo‘ljallangan edi. Bu uning FP8 hisob-kitoblariga tayanib ishlashi bilan bog‘liq bo‘lib, u sun’iy intellekt yordamida tasvirni qayta ishlashda yuqori aniqlikni ta’minlaydi. Biroq, dasturiy kodning sizib chiqishi va INT8 formatidagi modelning mavjudligi AMD’ni eski GPU’lar uchun ham moslashuvchanlikni ta’minlashga undadi.
Hozirda ixlosmandlar norasmiy vositalar orqali FSR 4’ni eski kartalarda sinab ko‘rishmoqda. Test natijalariga ko‘ra, RX 6000 seriyasida unumdorlik FSR 3 bilan solishtirganda 10–20 foizga pasayishi mumkin, ammo tasvir sifati sezilarli darajada yuqori. Bu esa foydalanuvchilar uchun maqbul kompromiss hisoblanadi.
AMD aynan FSR 4.1 versiyasini taqdim etishni rejalashtirmoqda. Ushbu yangilanish tasvirning xiralashishini kamaytirish, detallarni saqlab qolish va uzoqdagi obyektlarning tiniqligini oshirish kabi muhim yaxshilanishlarni o‘z ichiga oladi. Bu qadam eski Radeon egalari uchun grafik imkoniyatlarini sezilarli darajada uzaytirish imkonini beradi.
“Zamin”ni Telegramʻda oʻqing!
