Roki-Mauntins milliy laboratoriyasi olimlari quyosh energiyasini o‘zgartirishning yangi tizimini yaratishdi. Bu texnologiya an’anaviy quyosh panellariga qaraganda ancha samaraliroq ishlash imkoniyatiga ega. Yangi ishlanmaning asosiy xususiyati shundaki, u quyosh nuri yutilganda hosil bo‘ladigan yuqori energiyali zarralar — «issiq elektronlar»ni uzoqroq vaqt davomida ushlab tura oladi. Bu haqda Ixbt.com xabar beradi.
Oddiy quyosh panellarida va hatto o‘simliklarda quyosh nuridan olingan energiyaning katta qismi deyarli darhol issiqlik sifatida yo‘qoladi. Yangi texnologiya esa bu energiyani taxminan 5 nanosekund davomida saqlab qolish imkonini beradi. Bu standart kremniy materiallariga nisbatan 25 ming marta uzoqroq vaqt deganidir.
Tizim asosi maxsus kimyoviy ko‘prik yordamida molekulyar katalizator bilan bog‘langan kremniy nanokristallidan iborat. Aynan shu bog‘lovchi element elektronlar xulq-atvorini o‘zgartirib, energiyaning darhol tarqalib ketishiga yo‘l qo‘ymaydi va uni foydali kimyoviy reaksiyalar uchun saqlab qoladi.
Kelajakda ushbu texnologiya suvdan vodorod ishlab chiqarish, karbonat angidridni yoqilg‘iga aylantirish va atmosferadagi azotdan o‘g‘itlar yaratishda qo‘llanilishi mumkin. Agar mazkur ishlanmani keng miqyosda joriy etish imkoni tug‘ilsa, u yangi avlod quyosh energetikasi va «yashil» kimyo sanoati uchun asos bo‘lib xizmat qiladi.
“Zamin”ni Telegramʻda oʻqing!
