Xitoy dunyodagi eng yirik temir yoʻl vokzalini bor-yoʻgʻi 38 oy ichida qurib bitkazish uchun robotlar armiyasini ishga soldi. Gap mamlakatning gʻarbiy qismidagi yuqori tezlikdagi poyezdlar uchun moʻljallangan eng yirik tugun — Chunsing sharqiy vokzali haqida bormoqda. Loyihaning koʻlami va futuristik koʻrinishi hatto Elon Muskni ham hayratda qoldirdi. Bu haqda Ixbt.com xabar beradi.
Elon Musk oʻzining ijtimoiy tarmogʻida ushbu megaproekt haqidagi videoni eʼlon qilib, uni "kelajakka ochilgan darcha" deb atadi. Umumiy maydoni qariyb 1,22 million kvadrat metrni tashkil etuvchi supervokzal mintaqa transport tizimining asosiy boʻgʻini hisoblanadi. Bunday ulkan inshootning qisqa muddatda barpo etilishi xalqaro tajribadagi oʻn yillab davom etadigan qurilishlardan keskin farq qiladi.
Murakkab tabiiy sharoitlar — togʻli relyef, kesishgan joylar va yozda 40°C dan oshadigan issiq anʼanaviy qurilish usullarini samarasiz qilib qoʻydi. Ushbu toʻsiqlarni yengib oʻtish uchun pudratchilar ekstremal muhitda yuqori aniqlik va barqarorlik bilan ishlay oladigan avtomatlashtirilgan texnologiyalarga tayanishdi.
Poydevor tayyorlash bosqichida lazerli sath oʻlchagichlar, lidarlar, sunʼiy intellekt va 5G aloqasi bilan jihozlangan robotlashtirilgan tizimlar qoʻllanildi. Bu beton yuzalarning tekisligini millimetrgacha aniqlikda nazorat qilish, ish tezligini 3-5 baravar oshirish va mehnat sarfini 40 foizga qisqartirish imkonini berdi.
Bundan tashqari, 800 kg gacha yuk koʻtaradigan shisha fasadlarni oʻrnatuvchi robotlar, avtomatik payvandlash tizimlari va 24 soatlik nazorat datchiklari ishlatildi. Bunday jihozlash nafaqat unumdorlikni oshirdi, balki balandlikda ishlovchi ishchilar uchun xavflarni kamaytirib, ogʻir iqlim sharoitida barqaror sifatni taʼminladi.
“Zamin”ni Telegramʻda oʻqing!
