LG kompaniyasi Smart TV televizorlari orqali kuzatuv olib borilishini rad etdi

Janubiy Koreyaning texnologiya giganti LG kompaniyasi o‘zining Smart TV televizorlari orqali foydalanuvchilar ustidan yashirin kuzatuv olib borilishi hamda ularning suhbatlari yozib olinishi haqidagi ayblovlarga rasmiy munosabat bildirdi. Tom's Hardware nashrining xabar berishicha, mazkur bayonot Gamers Nexus tomonidan o‘tkazilgan keng ko‘lamli jurnalistik surishtiruvdan so‘ng e’lon qilingan bo‘lib, u raqamli xavfsizlik va shaxsiy ma’lumotlar daxlsizligi masalasida jiddiy muhokamalarni keltirib chiqargandi. Bu haqda Ixbt.com xabar beradi.

Ma’lumot o‘rnida ta’kidlash joizki, ilgari e’lon qilingan surishtiruvda dunyo bo‘ylab 216 milliondan ortiq LG televizorlari hatto o‘chirilgan holatda ham foydalanuvchilarning ovozini yozib olish imkoniyatiga egaligi iddao qilingandi. Shuningdek, ovozli buyruqlar shifrlanmagan holda saqlanishi hamda uy tarmog‘idagi boshqa qurilmalar haqidagi ma’lumotlar ham yig‘ib borilishi haqida xabarlar tarqatilgandi. Bu holat millionlab iste’molchilarda o‘z qurilmalarining xavfsizligi yuzasidan haqli savollarni tug‘dirgandi.

LG kompaniyasining rasmiy pozitsiyasi

Kompaniya vakillari mazkur ayblovlarni keskin rad etib, televizorlar hech qanday doimiy yashirin yozib olish jarayonini amalga oshirmasligini ma’lum qildi. LG bayonotiga ko‘ra, ovozli ma’lumotlarni uzatish jarayoni faqatgina ikkita holatda – pultdagi maxsus ovozli yordamchi tugmasi bosilganda yoki «Hi LG» kalit so‘zi aniq aytilgandagina boshlanadi.

Shuningdek, ishlab chiqaruvchi ovozli faollashtirish funksiyasi sukut bo‘yicha o‘chirilgan bo‘lishini va uni foydalanuvchining o‘zi faqat ixtiyoriy ravishda yoqishi mumkinligini tushuntirdi. Kalit so‘zni tanib olish jarayoni to‘g‘ridan to‘g‘ri televizorning o‘zida bajariladi. Bu esa qurilma atrofdagi barcha suhbatlarni yozib olib, tashqi serverlarga jo‘natmasligini anglatadi.

Uy tarmog‘i va reklama siyosati

Smart TV qurilmalarining lokal tarmoqdagi boshqa gadjetlarni aniqlashi haqidagi iddaolarga to‘xtalib o‘tar ekan, LG buni zamonaviy televizorlarning standart imkoniyati deb atadi. Biroq HDMI orqali ulangan qurilmalar tasvirlarini tahlil qilish masalasida kompaniya barcha foydalanuvchilarga tegishli shartlarni eslatib o‘tdi.

Kompaniya ma’lumotlariga ko‘ra, HDMI orqali ulangan qurilmalar tasvirini tahlil qilish faqatgina foydalanuvchi shaxsiylashtirilgan reklama va tavsiyalarga rozilik bergan taqdiridangina amalga oshiriladi. Shu bilan birga, tarmoqda tarqalgan eng jiddiy ayblovlardan biri – ovozli buyruqlarning shifrlanmagan holda serverlarda saqlanishi masalasi kompaniyaning rasmiy bayonotida izohsiz qoldirildi.