Anonymous xakerlari Rossiyaga qarshi «kiberurush» e’lon qildi va RT saytiga hujum uyushtirdi

^{Foto: AFP}
Anonymous xakerlik guruhi Rossiya hukumatiga qarshi «kiberurush» ochishini e’lon qildi. Bu haqda ular Twitter’dagi sahifasiga yozib qoldirgan.

Shuningdek, Anonymous vakillari RT telekanali saytiga uyushtirilgan hujum bo‘yicha mas’uliyatni o‘z zimmasiga olgan. Mazkur xabarni yozish vaqtida RT saytining Rossiya va bir qator xorijiy versiyalariga kirib bo‘lmayapti. RT’ning o‘zi oldinroq telekanal saytlariga DDoS-hujumlar uyushtirilayotganini ma’lum qilgan.

Bundan tashqari, 24 fevral kuni kechasi Kreml, hukumat va Rossiya parlamenti saytlariga kirishda muammolar yuzaga kelgan.

FQB tomonidan tashkil etilgan Kompyuter hodisalari milliy muvofiqlashtirish markazi Rossiya axborot resurslariga kiberhujumlar tahdidining keskin darajasini e’lon qilgan.

24 fevralga o‘tar kechasi Rossiya prezidenti Vladimir Putin Donbassda «mintaqa aholisini genotsiddan himoya qilish» uchun «maxsus harbiy operatsiya» boshlanganini ma’lum qildi. Murojaatdan so‘ng ijtimoiy tarmoqlarda Ukrainaning ko‘plab shaharlarida portlashlar sodir bo‘lgani haqida xabarlar paydo bo‘ldi. Ukraina Ichki ishlar vazirligi rahbari maslahatchisi Anton Gerashchenko 24 fevral kuni erta tongda Kiyev, Xarkov va Dneprda harbiy infratuzilma ob’ektlariga raketa zarbalari berilganini ma’lum qildi. “Zamin” yangiliklarini “Odnoklassniki”da kuzatib boring