O‘zbekistonda yoqilg‘i-energetika sohasida yana bir muhim tayinlov amalga oshirildi. Tegishli farmonga muvofiq, Behzod Normatov Prezidentning yoqilg‘i-energetika masalalari bo‘yicha maslahatchisi lavozimiga tayinlandi. Bu haqda O‘zbekiston Respublikasi Prezidentining tegishli farmoni imzolandi.
Ma’lumotlarga ko‘ra, Behzod Normatov ushbu tayinlovga qadar Prezident administratsiyasi huzuridagi neft-gaz sohasidagi islohotlarni jadallashtirish bo‘yicha loyiha ofisida sho‘ba mudiri sifatida faoliyat yuritib kelayotgan edi. U o‘zining ko‘p yillik tajribasi va sohadagi bilimi bilan ajralib turadi.
Normatov bungacha “Andijonneft” AJ boshqaruvi raisi, Energetika vazirligining Geologiya, neft va gaz qazib chiqarish boshqarmasi boshlig‘i lavozimlarida ishlagan. Shuningdek, u Energetika vazirining o‘rinbosari va "O‘ztransgaz” AJ boshqaruvi raisi lavozimlarida ham faoliyat yuritgan.
Eslatib o‘tish joiz, mazkur lavozimda shu vaqtgacha Alisher Sultonov faoliyat yuritib kelayotgan edi.
Mutaxassislar fikricha, mazkur tayinlov energetika sohasida olib borilayotgan islohotlarni yanada jadallashtirish, neft-gaz tarmog‘ida samaradorlikni oshirish hamda strategik loyihalarni izchil amalga oshirishda muhim ahamiyat kasb etadi.
“Zamin”ni Telegramʻda oʻqing!
