Ўзбекистонда истеъмолчилар учун ажратиладиган солиқ кэшбэки миқдори оширилиши мумкин, деб nova24.uz хабар берди. Бу ҳақда Солиқ қўмитаси раиси биринчи ўринбосари Мубин Мирзаев маълум қилган.
Унинг сўзларига кўра, бизнесни легаллаштириш шарти билан кэшбэк икки баробаргача кўтарилиши мумкин. Ҳозирда ушбу сумма 1% ни ташкил қилса, келгусида уни 2% гача ошириш имконияти кўриб чиқилмоқда.
Солиқ қўмитаси асосий мақсад сифатида нақдсиз тўловларни рағбатлантиришни белгилаган. Ҳозирда бюджетга тушаётган солиқларнинг учдан бири электрон тўлов тизимлари орқали амалга оширилмоқда. Бу кўрсаткич 60–70% гача етказилиши режалаштирилган.
Мирзаевнинг таъкидлашича, тўловлар электрон шаклда амалга оширилса, солиқ тўлашдан қочиш эҳтимоли камаяди ва солиқ органларига ортиқча ҳужжат сўрашга эҳтиёж қолмайди.
2024 йил 1 октябрдан бошлаб умумий овқатланиш, меҳмонхона ва туристик хизмат кўрсатувчи корхоналарга НДС қайтарилиши тизими жорий қилинган. Қайтариш миқдори нақдсиз тўловлар улушига қараб 20% дан 40% гача ташкил этади.
Мирзаевга кўра, агар ушбу чоралар ижобий натижа берса, кэшбэк бошқа соҳаларга ҳам жорий қилиниб, миқдор 2% гача оширилиши мумкин.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
