Ўзбекистонда Коксаки вируси тарқалгани ҳақидаги хабарлар рад этилди

Ижтимоий тармоқларда Ўзбекистонда болалар орасида Коксаки вирусининг оммавий тарқалиши ҳақида маълумот пайдо бўлди. Соғлиқни сақлаш вазирлиги вазиятни изоҳлади, деб nova24.uz хабар берди.

Маълумотга кўра, Санитария-эпидемиологик фаровонлик ва жамоат саломатлиги қўмитаси раисининг биринчи ўринбосари Нурмат Отабеков тушунтириш берди. Мутахассиснинг таъкидлашича, вирус ўзининг номини АҚШнинг Коксаки шаҳридан олган бўлиб, у ерда илк бор аниқланган ва энтеровируслар оиласига мансуб, 70 дан ортиқ турларни ўз ичига олади. Бунда кўпинча А ва В турлари учрайди.

Шунингдек, у вирус асосан 3 ёшдан 10 ёшгача бўлган болаларга таъсир қилишини, катталарда эса жуда кам учрашини таъкидлади. Болалардаги симптомларга ҳароратнинг кескин кўтарилиши (39-40 °C гача), бош оғриғи, уйқусизлик, ҳолсизлик киради. 2-4 кундан кейин ҳарорат тушади. Шунингдек, шамоллашга хос симптомлар, ичак касалликлари, кўнгил айниши, қусиш ҳам қайд этилган.

Касалликка чалинганларда кафтлар, оёқлар ва оғиз бўшлиғи шиллиқ қаватида тошмалар, шунингдек, оғиздаги яралар билан боғлиқ томоқ оғриғи, иштаҳа пасайиши кузатилиши мумкин. Баъзан лимфа тугунларининг катталашиши ва бош оғриғи кузатилади. Инфекция кўпинча ёзда, болалар жамоат бассейнларидан фойдаланганда ва касаллар билан яқин алоқада бўлганда содир бўлиши қайд этилган. Касалликнинг инкубацион даври 2-10 кунни, айрим ҳолларда 2-5 кунни ташкил этади.

Мутахассиснинг таъкидлашича, дунё бўйлаб аниқланган ҳолатларга қарамай, бугунги кунгача Санитария-эпидемиологик фаровонлик қўмитаси ва Ўзбекистон Вирусология институти лабораторияларида ушбу вирус аниқланмаган. Шу сабабли, унинг мамлакатда кенг тарқалганлиги ҳақидаги даъволар асоссиздир.

Шунингдек, вирус жиддий оқибатларга олиб келмаслиги ва аксарият ҳолларда асоратларсиз ўтиши қайд этилди. Бироқ, мутахассислар Коксаки вирусига қарши самарасиз бўлгани учун болани вирусга қарши ёки антибактериал препаратлар билан мустақил даволашни қатъиян тавсия этмайдилар. Симптомлар пайдо бўлганда ва айниқса, касаллик оғир кечганда, аҳолига тиббий ёрдам сўраб мурожаат қилиш ва шифокор тавсияларига риоя қилиш тавсия этилди.