Ўзбекистон тарихида унутилмас воқеа юз берди — Саудия Арабистонидан муқаддас Каъбанинг эшигига тегишли ёпинчиқ (кисва)нинг тўлиқ қисми юртимизга олиб келинди. Бу ноёб артефакт Ислом цивилизацияси маркази музейида алоҳида экспозиция сифатида жой олиши режалаштирилмоқда.
Маълумки, Каъба ҳар йили янги кисва билан қопланади. У зийратчилар учун муқаддас ва руҳий қадрият тимсоли саналади. Шу боис унинг кичик бир парчаси ҳам мусулмон оламида беқиёс аҳамиятга эга ҳисобланади.
Эслатиб ўтамиз, жорий йилнинг февралида Ўзбекистон президенти Шавкат Мирзиёев Саудия Арабистони ҳаж ва умра ишлари вазири Тавфиқ бин Фавзон ар-Рабиа бошчилигидаги делегацияни қабул қилганди. Шу учрашувда давлат раҳбарига Саудия подшоҳи Салмон Ол Сауд томонидан юртимиз халқига бағишланган қимматли ҳадя — муқаддас Каъба кисванинг бир парчаси топширилган эди.
Ордан вақт ўтиб, энди эса бутун эшик қисми, яъни Каъба қопламасининг энг қадрли бўлаги Ўзбекистонга етказилди. Мутаҳассислар бу воқеани мамлакатимиз тарихидаги муҳим диний ва маданий воқеа сифатида баҳоламоқда. Чунки мазкур артефакт нафақат мусулмонлар учун муқаддаслик рамзи, балки Ўзбекистоннинг ислом цивилизациясида тутган ўрни ва аҳамиятининг яна бир тасдиғидир.
Ислом цивилизацияси маркази маълум қилишича, ушбу ёпинчиқ музей экспозициясида намойишга қўйилиб, минглаб зиёратчи ва тадқиқотчилар учун очиқ бўлади. У орқали мусулмон дунёси тарихи, муқаддас Каъбанинг аҳамияти ва Саудия ҳамкорлигининг рамзий қиммати янада кенг ёритилади.
Таъкидлаш жоиз, бу ҳадя икки мамлакат ўртасидаги диний ва маданий алоқаларнинг мустаҳкамланишидан далолат беради. Саудия подшоҳлиги ва Ўзбекистон ҳамкорлиги натижасида юртимиз тарихий мероси ва мусулмон цивилизацияси билан боғлиқ экспонатлар янада бойиб бормоқда.
«Замин»ни Telegram’да ўқинг!
