Ўзбекистонда маҳкумлар учун янги рағбатлантирувчи тизим йўлга қўйилмоқда. Сенатнинг ўнинчи ялпи мажлисида муҳокама қилинган ва маъқулланган қонунга кўра, энди маҳкумлар ҳар бир ўқиган китоби учун жазо муддатидан уч кун қисқартириш имкониятига эга бўлади.
Расмий маълумотларга кўра, ушбу ташаббус маҳкумларни тарбиялашда самарадорликни ошириш, уларнинг маънавий дунёқарашини бойитиш ва оила ҳамда жамиятдан узилиб қолишининг олдини олиш мақсадида жорий этилмоқда. Китоб ўқиш орқали уларда қонунга итоаткорлик, маънавий ва ахлоқий қадриятларга садоқатни шакллантириш кўзда тутилган.
Қонунга мувофиқ, Жиноят кодекси 74-1-модда билан тўлдирилиб, шахснинг тузалиш йўлига ўтганини ҳисобга олиб жазо муддатини қисқартириш ҳуқуқий жиҳатдан мустаҳкамланмоқда. Бунда Республика маънавият ва маърифат маркази томонидан тасдиқланган махсус рўйхатдаги китобларни ўқиш талаб қилинади.
Шунингдек, маҳкум китобни тўлиқ ўқигани факти махсус тартибда тасдиқланганда, ҳар бир китоб учун уч кундан, бир йилда эса кўпи билан ўттиз кунгача суд қароридан кейин жазо муддати қисқартирилиши мумкин.
Бу тартиб умрбод озодликдан маҳрум этилганлардан ташқари, шартли равишда муддатидан олдин озод қилиниши мумкин бўлган шахсларга тааллуқли бўлади.
Сенаторлар таъкидлаганидек, мазкур норма 13,5 мингдан ортиқ маҳкумга татбиқ қилиниши мумкин. Мутахассислар эса бу тизим фақат жазо муддатини қисқартириш эмас, балки маҳкумларни маънавий жиҳатдан тиклаш ва жамиятга қайта мослаштиришда муҳим қадам бўлишини қайд этмоқда.
Шу тариқа, китоб ўқиш нафақат билим манбаи, балки маҳкумлар учун эркинликка яқинлашиш воситаси сифатида ҳам хизмат қилади.
«Замин»ни Telegram’да ўқинг!
