Ўзбекистонда 2026 йил баҳоридан пенсияни олдиндан ҳисоблаш хизмати ишга туширилади, деб Spot.uz хабар берди. Бу ҳақда 10 сентябрь куни Иқтисодиёт ва молия вазирлиги ҳузуридаги Пенсия жамғармаси ижрочи директори Муродбек Атажанов маълум қилди.
Ҳозирда “Моя пенсия” дастури ишлаб чиқилмоқда. У пенсия ёшига етмаган фуқаролар учун мўлжалланган бўлиб, уларга келажакдаги пенсия миқдори тўғрисида олдиндан маълумот олиш имконини беради.
Фойдаланувчи ПИНФЛни киритиб, OneID орқали идентификациядан ўтади. Сўнг у ҳақидаги маълумотлар — ойлик маоши, иш стажи, таълим даври, аёллар учун болалар сони, эркаклар учун ҳарбий хизмат — 26 та идора маълумотлари билан интеграция қилинган ҳолда кўрсатилади ва шу асосда пенсия миқдори ҳисобланади.
Дастур фуқароларга ёшга доир пенсия олиш учун стажи етарлими-йўқми, деган саволга ҳам жавоб беради. Агар стаж етарли бўлмаса, бу норасмий иш бозоридан чиқиб, расмий ва юқори маошли ишга ўтишга рағбатлантириши мумкин.
“Моя пенсия” дастурининг дастлабки ишга туширилиши 2026 йил 1 сентябрга мўлжалланган эди. Аммо Пенсия жамғармаси буни тезлаштириб, 2026 йил апрель-май ойларидаёқ фаолиятни бошлашни режалаштирмоқда.
1993 йилда қабул қилинган “Фуқароларни давлат пенсия таъминоти тўғрисида”ги Қонунга кўра, эркаклар 60 ёшда (25 йил иш стажи билан), аёллар эса 55 ёшда (20 йил иш стажи билан) пенсия олиш ҳуқуқига эга.
Шунингдек, Президентнинг 2024 йил 26 июнидаги қарорига мувофиқ, 2026 йил 1 декабрдан бошлаб “Моя пенсия” онлайн хизмати фуқароларнинг электрон маълумотларига асосланган ҳолда пенсия миқдорини олдиндан ҳисоблаб бериш функцияси билан ишга тушади.
«Замин»ни Telegram’да ўқинг!
