NF Group маълумотларига кўра, Ўзбекистон юқори сифатли омбор кўчмас мулки ҳажми бўйича МДҲ давлатлари орасида учинчи ўринни эгаллади, деб Kursiv.uz хабар берди. 2025 йилнинг учинчи чорагида мамлакатда умумий 555 минг квадрат метр омбор майдони қайд этилган.
Рейтингда Қозоғистон (1,78 млн кв. м) ва Беларус (1,72 млн кв. м) етакчилик қилмоқда. Ўзбекистон эса кучли учликка кириб, омборлар инфратузилмасини ривожлантираётган давлатлар қаторидан жой олди.
Мавжуд омборларнинг 56 фоизи В синфига киради. 53 фоизи спекулятив лойиҳалар бўлиб, 20 фоизидан компаниялар ўз эҳтиёжлари учун фойдаланади, 15 фоизи эса логистика (3PL) операторлар ихтиёрида.
2024 йил 4-чорагидан 2025 йил 3-чорагигача мамлакатда 160 минг кв. м янги омбор майдонлари фойдаланишга топширилди. 2026 йил охирига қадар яна 370 минг кв. м омбор қурилиши режалаштирилган.
Ўзбекистонда бўш омбор майдонлари даражаси жуда паст — атиги 1,7 фоизни ташкил этади. Ижара нархлари эса: А синфдаги омборлар учун ўртача йиллик $156 (тахминан 1,9 млн сўм), В синфи учун эса $90 (тахминан 1,1 млн сўм).
