Тошкент вилоятида ўтказилаётган “Хавфсиз кибермакон” тезкор-профилактика ойлиги доирасида интернет орқали амалга оширилган навбатдаги фирибгарлик иши фош этилди. Бу ҳақда вилоят Ички ишлар бош бошқармаси расмий маълумот берди.
Маълум бўлишича, тўрт нафар шахс осон йўл билан даромад топиш мақсадида Instagram ва Telegram ижтимоий тармоқларида сохта саҳифалар очиб, ўзларини эркаклар кийимлари дўкони сифатида таништирган. Улар арзон нархларда маҳсулот таклиф қилиб, мижозларни олдиндан пул ўтказишга ундашган. Пул эса бегона шахслар номига расмийлаштирилган банк карталарига йўналтирилган ва шахсий эҳтиёжлар учун ишлатилган.
Тафсилотларга кўра, жорий йилнинг 11 июнь куни Тошкент туманида яшовчи бир фуқаро реклама қилинган кийимни харид қилиш учун 1 миллион сўмни фирибгарлар кўрсатган карта рақамига ўтказган. Бироқ маблағ ўтказилгандан сўнг барча ёзишмалар ўчирилган ва мулоқот узилган.
Дастлабки тергов жараёнлари шуни кўрсатмоқдаки, сўнгги бир ой ичида улар турли шахсларнинг 279 та банк картасидан турли усулларда 101 миллион сўмдан ортиқ маблағни алдов йўли билан қўлга киритишган.
Ҳозирда ушбу шахсларга нисбатан Ўзбекистон Республикаси Жиноят кодексининг 168-моддаси (фирибгарлик) 3-қисми бўйича жиноят иши қўзғатилди. Тергов ҳаракатлари давом этмоқда ва улар қонун олдида жавоб беришлари таъкидланмоқда.
Тошкент вилояти ИИББ барча фуқароларни яна бир бор эҳтиёткорликка чорлади: онлайн харидда шошилмаслик, олдиндан пул ўтказмаслик, арзон эълонларга ишонмаслик ва фақат ишончли саҳифалар орқали буюртма бериш кераклиги эслатилди. Шунингдек, шубҳали ҳолатларда тезкор равишда ички ишлар органларига хабар бериш зарурлиги таъкидланди.
«Замин»ни Telegram’да ўқинг!
