Об-ҳаво мутахассислари янги ҳафтада мамлакатимизда кескин ўзгаришлар бўлишини маълум қилмоқда. "Ўзгидромет" матбуот хизмати тарқатган маълумотларга кўра, Ўзбекистон ҳудуди Қозоғистон жанубида шаклланган баланд тоғли циклон таъсирида қолади. Бу эса совуқ ва нам ҳаво оқимлари кириб келишига олиб келиши айтилмоқда.
15 сентябрь кунидан бошлаб айрим ҳудудларда қисқа муддатли ёмғир ёғиши ва момақалдироқ кузатилиши эҳтимоли катта. Жумладан, Навоий вилоятининг шимолий қисмида куннинг биринчи ярмида ёмғир ёғиши мумкин. Шу куни кечқурун ва эртасига ўтар кечаси Тошкент вилоятининг айрим ҳудудларида ҳам қисқа муддатли ёмғир ёғиб, кўкдан чақмоқ чақиши эҳтимол қилинмоқда.
Фарғона водийси аҳолиси эса 16 сентябрь кечқурундан 19 сентябрь эрталабкача давомида ёмғирли кунларга тайёргарлик кўриши керак бўлади. Қолган вилоятларда эса ёғингарчилик кутилмайди. Бироқ тоғ олди ва баланд тоғли ҳудудларда бутун иш ҳафтаси давомида тинимсиз ёмғирлар ёғиши ва айрим жойларда кучли ёмғир кузатилиши таъкидланмоқда. Об-ҳаво мутахассисларининг огоҳлантиришича, баъзи баланд ҳудудларда ёмғир қорга айланиши ҳам мумкин.
Ҳарорат кескин пасайиши кутилмоқда. 16–18 сентябрь кунлари кундузги ҳарорат 20–25 даражагача тушиши, 19 сентябрдан эса салқин ҳаво массалари чекина бошлаб, ҳарорат яна 2–3 даражага кўтарилиши маълум қилинди. Бу жараён аҳоли учун ҳам сезиларли бўлади: тонгги соатларда салқинлик кучайиб, кечқурунларда қўшимча кийимсиз кўчага чиқиш ноқулай бўлиши мумкин.
Шамол тезлиги ҳам баъзи жойларда кескин ошиши мумкин. Мутахассислар маълум қилишича, республика бўйлаб айрим ҳудудларда шамол секундига 13–18 метргача кучайиши кутилмоқда. Бу эса чанг-тўзон кўтарилишига сабаб бўлиши эҳтимолини оширади.
Тошкент шаҳри аҳолиси учун эса прогноз нисбатан қулай. Ҳаво асосан қуруқ бўлади, фақат 15 сентябрь кечқурун, шунингдек, 16 сентябрь кечаси ва эрталаб қисқа муддатли ёмғир ёғиши мумкин. Шамол шимоли-шарқ йўналишидан 3–8 м/с тезликда эсади, айрим вақтларда 10–12 м/с гача кучайиши мумкин. Ҳарорат эса 16–18 сентябрь кунлари 20–25 даражагача пасайиб, 19 сентябрь куни яна 25–27 даража атрофида бўлиши кутилмоқда.
Об-ҳаводаги бундай кескин ўзгаришлар ҳафта давомида аҳоли турмуш тарзига ҳам таъсир кўрсатиши мумкин. Хусусан, дала ишлари билан банд кишилар, йўлларда ҳаракатланувчи ҳайдовчилар ва тоғли ҳудудларда саёҳатга чиққанлар хавфсизлик чораларига жиддий эътибор қаратишлари лозим.
Кутилмаган қор аралаш ёмғирлар эса бу йилги куз мавсумининг бошқаларидан фарқ қилиб, барвақт совуқлик билан кириб келаётганидан дарак бермоқда.
«Замин»ни Telegram’да ўқинг!
