Ўзбекистонда ҳайвонларга нисбатан шафқатсиз муносабат қилиш ҳолатларига қарши кураш кучаймоқда. Олий суд маълумотларига кўра, жорий йилнинг биринчи ярмида бу каби ҳуқуқбузарликлар бўйича 34 нафар фуқаро жавобгарликка тортилган.
Расмий маълумотларга кўра, уларнинг 32 нафарига жарима жазоси қўлланилган бўлса, яна икки шахс 15 суткагача маъмурий қамоқ билан жазоланган. Суд матбуот котиби таъкидлашича, ҳайвонларни қасддан қийнаш, уларга азоб бериш ёки уларнинг ўлимига сабабчи бўлиш ҳолатларига нисбатан жазо чоралари қатъий белгиланган.
2020 йилдан 2024 йилгача бўлган даврда Маъмурий жавобгарлик тўғрисидаги кодекснинг 111-моддаси асосида жами 397 киши жавобгарликка тортилган. Улардан 363 нафарига жарима қўлланилган, 34 киши эса маъмурий қамоқ жазосини ўтаган.
Қонунчиликка кўра, ҳайвонларни қасддан қийнаш ёки азоб бериш учун нафақат жарима, балки қамоқ жазоси ҳам белгиланган. Агар бу каби қилмиш такроран содир этилса, жазо миқдори янада оғирлашади. Шунингдек, 2021 йилдан бошлаб Жиноят кодексига ҳам ҳайвонларга нисбатан шафқатсиз муносабат учун алоҳида модда киритилган.
Олий суднинг таъкидлашича, бу каби чоралар нафақат ҳайвонларни ҳимоя қилиш, балки жамиятда инсонпарварлик ва масъулият туйғусини мустаҳкамлаш учун ҳам жуда муҳим. Мутахассислар фикрича, жонзотларга нисбатан шафқатсизлик кўрсатган одамлар жамият хавфсизлиги учун ҳам таҳдиддир.
Эслатиб ўтамиз, аввалроқ Бухорода тор қафасда сақланаётган айиқ ҳақида жамоатчилик орасида кенг муҳокамалар бўлган эди. Танқидлардан сўнг ҳайвон каттароқ майдонга кўчирилган. Фаолларнинг таъкидлашича, у 10 кундан зиёд ноқулай шароитда яшашга мажбур бўлган.
Мутасаддилар бу ҳолат жамиятда ҳайвонларга инсоний муносабат қилиш масаласи қанчалик долзарб эканини яна бир бор кўрсатганини қайд этмоқда.
«Замин»ни Telegram’да ўқинг!
