Сенатор Эркин Гадоев пойтахтда йўллардаги қаторлик ва тирбандликларни камайтириш масаласини қўллаб, Транспорт вазирлигига расмий сўров юборди. Бу ҳақда Олий Мажлис Сенати маълум қилди.
Маълум қилишларича, ўқув йили бошланиши билан Тошкент шаҳрида ҳаракат кескин кучаяди ва айрим вақтларда тирбандлик даражаси энг юқори — 10 баллгача бўлади. Бу эса ишга, таълимга ва турли мақсадларда пойтахтга йўл олган минглаб фуқароларнинг вақти ва самарадорлигини сезиларли даражада пасайтиради.
Статистикага кўра, ҳар куни 1 миллионга яқин киши пойтахтга ташриф буюради, шундан тахминан 275 минг нафари Тошкент вилоятидан келади. Ҳудуднинг барча қисмларидан минглаб автомобиллар эрталаб пойтахтга кириб, кечқурун қайтиши тирбандликларни янада кучайтиради.
Сенаторнинг сўровида вазирликдан Тошкент шаҳрида тирбандликларни камайтириш бўйича амалга оширилаётган чоралар, «Интеллектуал транспорт» тизимининг амалдаги ҳолати, президент томонидан белгиланган вазифаларнинг бажарилиши ва кечикиш сабаблари ҳақида маълумот тақдим этиш сўралган.
Бундан олдин ҳам сенатор Кобул Турсунов рақамли технологиялар вазири Шерзод Шерматовга IMEI кодларни рўйхатдан ўтказишда юзага келаётган муаммолар юзасидан сўров юборганди.
Ушбу ташаббус пойтахтдаги йўл ҳаракати ва фуқароларнинг ҳаракатини яхшилашга қаратилган муҳим қадам сифатида баҳоланмоқда.
«Замин»ни Telegram’да ўқинг!
