Ўзбекистонда рақамли ҳаёт тобора ривожланиб, аҳолининг интернетдан фойдаланиш кўрсаткичи рекорд даражага етди. Миллий статистика қўмитаси маълумотларига кўра, 2025 йилнинг январь–август ойлари ҳолатига интернетдан фойдаланувчилар улуши мамлакат аҳолисининг 94,2 фоизини ташкил этди.
Бу рақам сўнгги йилларда интернет инфратузилмаси ва рақамли хизматлар қанчалик жадал суръатлар билан ривожланаётганини яққол намоён қилади. Хусусан, 2021 йилда бу кўрсаткич 76,6 фоизни ташкил этган бўлса, 2022 йилда 83,9 фоизга кўтарилган. 2023 йилда эса аҳолининг 89 фоизи интернетдан фойдаланган, 2024 йилда эса қамров даражаси 93,3 фоизга етган.
Кўриниб турибдики, сўнгги тўрт йил ичида интернет қамрови қарийб 18 фоизга ўсган. Бу эса нафақат технологиялар тараққиёти, балки аҳолининг рақамли хизматларга қизиқиши ва улардан фаол фойдаланишини ҳам кўрсатади.
Мутахассислар таъкидлашича, аҳоли улушининг бундай даражада юқори интернет фаоллиги мамлакатда таълим, тижорат, ахборот алмашинуви ва хизмат кўрсатиш соҳаларини янги босқичга кўтармоқда. Шу билан бирга, давлат хизматлари ҳам босқичма-босқич рақамли форматга ўтмоқда, бу эса фуқаролар учун қулайлик яратади.
Таҳлилчилар фикрича, интернетдан фойдаланувчилар улуши 100 фоизга яқинлашиши, мамлакатда рақамли иқтисодиёт ва онлайн хизматларнинг янада оммалашишига олиб келади. Бу жараён, айниқса, ёшлар орасида янги имкониятлар эшигини очмоқда.
Шу тариқа, Ўзбекистонда интернет қамровининг 94,2 фоизга етиши мамлакатнинг рақамли тараққиёт йўлида қўйган навбатдаги муҳим қадами сифатида баҳоланмоқда.
“Zamin”ни Telegram'да ўқинг!
