Тошкент вилоятида 18 ёшли йигит Ўзбекистон Президенти Шавкат Мирзиёев ҳақида Instagram орқали ҳақоратомуз изоҳ қолдиргани учун суд томонидан жавобгарликка тортилди. Суд ҳужжатларига кўра, у ўз аккаунти орқали Президентнинг тасвири жойлаштирилган фотосурат остида ҳақоратли ва обрўсизлантирувчи мазмунда фикр ёзган.
Тергов давомида ўтказилган суд-сиёсатшунослик ва лингвистик экспертиза хулосаларига кўра, ёзилган изоҳда давлат раҳбарига нисбатан ҳақорат ва шаънини камситувчи сўзлар мавжудлиги тасдиқланган. Мутахассислар бу изоҳ жамоатчилик онгида давлат институти обрўсига салбий таъсир кўрсатиши мумкинлигини қайд этган.
Суд жараёнида айбланувчи ёш йигит ўз қилмишини тан олди ва бу изоҳни “ўйламасдан, ҳиссиёт билан ёзган”ини айтди. Унинг сўзларига кўра, ҳеч қандай сиёсий мақсад бўлмаган ва қилган ишидан афсусда экани билдирилди.
Суд унинг қилмишини Ўзбекистон Республикаси Жиноят кодексининг 158-моддаси 3-қисми — “Интернет орқали Президентни ҳақоратлаш ёки туҳмат қилиш” деб малакалиб, айбли деб топди.
Ҳукмга кўра, айбланувчига икки йил муддатга озодликни чеклаш жазоси тайинланди. Шунингдек, суд унинг фаолиятига бир қатор чекловлар ҳам жорий этди.
Ёш йигит эндиликда алкоголь ичимликлар истеъмол қиладиган ва кўнгилочар жойларга (бар, кафе, ресторан) бормайди, оммавий тадбирларда қатнашмайди ва жиноятга мойил шахслар билан мулоқот қилмайди. Шу билан бирга, маҳкумни назорат қилувчи орган розилигисиз яшаш жойини ўзгартириши ёки Тошкент вилоятидан ташқарига чиқиши мумкин эмас.
Юристлар таъкидлашича, бу ҳолат мамлакатда интернет маданияти ва онлайн масъулият масалалари яна бир бор долзарб эканини кўрсатди. Айрим мутахассислар ёшлар орасида ижтимоий тармоқларда сўз эркинлиги билан шахсий ҳақоратни фарқлаш маданиятини шакллантириш муҳимлигини таъкидламоқда.
Шу билан бирга, суднинг бу қарори жамоатчилик орасида турли муносабатларга сабаб бўлди. Айримлар бу ҳолатни “огоҳлантирувчи чора” сифатида баҳолаган бўлса, бошқалар интернетда фикр билдириш эркинлигини чегаралаш ҳақида баҳс юритмоқда.
Ҳозирда суд ҳукми қонуний кучга кирган ва ёш йигит белгиланган тартибда жазо муддатини ўтаб бормоқда.
“Zamin”ни Telegram'да ўқинг!
