Ўзбекистон яқин соатларда магнит бўрони таъсирига тушиши мумкин. Метеонова сайти маълумотларига кўра, 19 октябрь куни мамлакат ҳудудида “тўқ сариқ даражадаги” геомагнит фаоллик кузатилиши кутилмоқда, деб хабар берди meteonova.ru.
Мутахассислар маълум қилишича, геомагнит ғалаёнлар кучининг 4 баллгача кўтарилиши кутиляпти. Бу ҳолат айниқса эрталабки соатларда — тахминан 05:00 дан 08:00 гача давом этади. Кейинроқ фаоллик секин пасайиб, 3 балл даражасига тушиши кутилмоқда.
Магнит бўронлари — бу қуёш фаолиятининг ер магнит майдонига таъсири натижасида вужудга келадиган табиий ҳодиса. Бундай вақтларда инсон организми, айниқса, метеосезгир одамлар бундан таъсирланиши мумкин.
Тиббиёт мутахассислари таъкидлашича, бундай кунларда юрак-қон томир касалликлари, қандли диабет, асаб тизими ёки бронхиал астма билан оғриган фуқароларда ҳолсизлик, бош оғриғи, юрак уриши ёки уйқусизлик кузатилиши мумкин.
Шунингдек, ҳаво ва атмосфера ўзгаришларига сезгир инсонлар, айниқса, кекса ёшдагилар ўзини безовта ҳис қилиши эҳтимолдан холи эмас. Мутахассислар бундай пайтда тинч муҳитда бўлиш, кўпроқ сув ичиш ва ортиқча стрессдан сақланишни тавсия этмоқда.
Баъзи олимлар фикрича, магнит бўронлари фақат инсон организмига эмас, балки электр ускуналари, йўл ҳаракати тизимлари ва ҳатто сунъий йўлдош алоқаларига ҳам таъсир кўрсатиши мумкин. Шу боис, табиий жараёнлар ҳақида олдиндан маълумот берилиши аҳолини хабардор этишда муҳим аҳамият касб этади.
Метеорологлар таъкидламоқда: бундай фаоллик одатда 1–2 кун давом этади ва соғлом инсонлар учун хавфли эмас. Аммо саломатлиги заиф бўлганлар бу кунларда юкламаларни камайтириб, дам олишга кўпроқ вақт ажратишлари лозим.
Бунинг ортидан айтиш мумкинки, табиатдаги ҳар бир ўзгариш инсон организми билан узвий боғлиқ. Шунинг учун метеосезгир инсонлар ўз ҳолатини диққат билан кузатиб боришлари ва керак бўлса, шифокор маслаҳатидан фойдаланишлари тавсия этилади.
“Zamin”ни Telegram'да ўқинг!
