Ўзбекистонда туғилиш кўрсаткичлари юқори даражада сақланмоқда — ҳар дақиқада икки нафар чақалоқ дунёга келмоқда, деб хабар берди oila-gen.uz.
Оила ва гендер илмий-тадқиқот институти маълумотларига кўра, 2024 йил давомида мамлакат бўйлаб 926,4 мингдан ортиқ чақалоқ туғилган. Бу рақамлар статистикадан ташқари, аҳолининг ўсиш суръати, оилалар сони ва ёш авлод улушининг ортиб бораётганини кўрсатади.
Таҳлилларга қараганда, ҳар куни ўртача 2531 нафар янги туғилган бола дунёга келади. Бу эса ҳар соатда 105 нафар, ҳар дақиқада икки нафар ва тахминан ҳар 34 сонияда бир чақалоқ туғилади, дегани.
Қиёс учун: Қозоғистонда бу кўрсаткич ҳар дақиқада 0,6 нафарни, Тожикистонда 0,5 нафарни, Қирғизистонда 0,3 нафарни ташкил этади. Туркияда ҳар дақиқада 3 нафар, Германия ва Францияда 1,4 нафардан, Хитойда 17, Ҳиндистонда эса 43 чақалоқ дунёга келмоқда.
Институт мутахассислари таъкидлашича, бу рақамлар шунчаки статистика эмас. Улар мамлакатда оила институти мустаҳкамланаётганини, ёшлар улуши юқори эканини ва демографик ўсишнинг фаол босқичи давом этаётганини англатади.
Шу билан бирга, мутахассислар демографик ўсиш меҳнат бозори, таълим тизими ва ижтимоий инфратузилмаларга бўлган талабни ҳам ортишига сабаб бўлишини қайд этмоқда. Яъни, бугунги чақалоқлар — эртанги куннинг ёш кадрлари, устозлари ва мутахассислари.
Демографлар фикрича, Ўзбекистон ҳозир “демографик дивиденд” даврини бошдан кечирмоқда — яъни иш қобилияти юқори бўлган ёш аҳоли улуши кўпайиб, иқтисодий ўсиш учун янги имкониятлар яратилаётган босқичда турибди.
Мутахассислар таъкидламоқда: оилалар сонининг кўпайиши нафақат статистик ўсиш, балки ижтимоий барқарорлик ва миллатнинг келажак салоҳиятини ҳам белгилайди. Чунки ҳар бир чақалоқ — бу янги ҳаёт, янги умид ва мамлакатнинг эртасига қўшилаётган қимматли ҳиссадир.
“Zamin”ни Telegram'да ўқинг!
