Тошкентдаги савдо-кўнгилочар марказларда ўзини ҳаддан ошириб юрадиган суратчилар фаолияти фуқароларнинг норозилигига сабаб бўлмоқда, деб UPL хабар берди.
Хусусан, High Town Mall савдо марказида айрим суратчилар ота-оналарнинг розилигисиз болаларни суратга олиб, сўнгра уларнинг суратлари туширилган магнит ёки кружка каби маҳсулотларни мажбурий сотишга уринишмоқда. Улар болаларни деярли қувиб юриб, майдончадан чиққан заҳоти ота-оналарга мурожаат қилишади.
UPL мухбири эксперимент тариқасида болаларининг суратлари туширилган икки магнитни 60 минг сўмдан сотиб олди. Орадан кўп ўтмай, бошқа бир суратчи келиб, болалар кружка буюртма берганини айтди ва ҳар бири учун 100 минг сўм талаб қилди. Бу каби ҳолатлар нафақат аҳоли, балки сайёҳлар орасида ҳам салбий таассурот уйғотмоқда.
Маълум қилинишича, Ўзбекистонда шахс ва болаларни суратга олиш учун алоҳида рухсатнома олишни мажбурий қилувчи ҳуқуқий ҳужжат ишлаб чиқилмоқда. Бу каби ҳолатларга қонуний чора кўрилиши кутилмоқда.
“Zamin”ни Telegram'да ўқинг!
