Ўзбекистонлик ҳайдовчилар учун янги иш имконияти пайдо бўлди. Ўзбекистон Бош консулхонаси ва Бирлашган Араб Амирликларидаги “Dubai Taxi Company PJSC” раҳбарияти ўртасида икки томонлама музокаралар бўлиб ўтди, деб хабар берди манбалар.
Учрашувда Ўзбекистондан малакали ҳайдовчиларни БААда қонуний равишда ишга жойлаштириш, уларнинг ҳуқуқларини ҳимоя қилиш ва меҳнат шартларини шаффоф ташкил этиш масалалари муҳокама қилинди.
Компания раҳбари Сайид Амин Абдулраҳман ўз нутқида ўзбекистонлик ҳайдовчиларнинг масъулияти ва тажрибасини юқори баҳолаб, уларни Дубай такси хизматида ишга жалб этишга тайёрлигини билдирди.
Унинг таъкидлашича, дастлабки босқичда 200 нафар ҳайдовчи ишга қабул қилиниши мумкин. Агар уларнинг фаолияти самарали бўлса, яна 500 нафаргача ўзбекистонлик фуқароларни жалб этиш режалаштирилган.
Музокаралар якунида Ўзбекистон Меҳнат агентлиги ва “Dubai Taxi Company PJSC” компанияси ўртасида ҳамкорликни амалий босқичга олиб чиқиш бўйича келишувга эришилди.
Маҳаллий мутахассислар фикрича, мазкур лойиҳа нафақат иш билан таъминлаш соҳасида муҳим қадам, балки Ўзбекистон ҳайдовчиларининг хорижий меҳнат бозоридаги обрўсини янада мустаҳкамлайди.
“Zamin”ни Telegram'да ўқинг!
